Read Tedim Chin JOB 24 Bible Online

JOB 24 - Tedim Chin bible

JOB 24

¹“Pasian in bang hangin a thukhen ni ding seh lo a, ama nasemte thutang ahihna a lah ni ding seh lo ahi hiam?

²“Mihingte in leitang zaipi a ngah theih nadingun gisuangte khinsim uh a, tuute gu-in amau’ tuuhonte tawh khawi khawm uh hi.

³Mi tagahte’ la neihsunte guksak uh a, meigong numei in a leiba a loh khit dong a bawngtal a matsak uh hi.

⁴Mizawngte’ ngah theih dingte khaktan uh a, mizawngte notkhia ahih manun amaute lau-in a bucip uh hi.

⁵“Tua ahih manin gamlak a om la bangin gam keu sungah a an ding uh zongtawm uh a, a tate uh an ding koimahah mu zo lo uh hi.

⁶Midangte’ lo sungah anlak na sem uh a, migilote’ leenggui lo-ah leenggah loin a om uh hi.

⁷Zanin puan silhloin lum uh a, khuadampi lakah silh ding nei loin om uh hi.

⁸Mualtung gam panin a hong zu guahtui in amaute kawtciimsak a, suangpi pang peuh beelin a toncip uh hi.

⁹“Migilote in pa nei nawn lo naupangte sila-in nei uh a, mizawngte’ tate leiba tangin a la uh hi.

¹⁰Tua mizawngte in puan silhloin na sem uh a, gilkialpi mahin anlak na a sem uh hi.

¹¹A thau ngah nadingin oliv gahte gawi-in leenggahzu ngah nadingin leenggahte cil napi-in, gilkial dangtakin ki-omsak hi.

¹²Khuapi sungah a liam le a si kuante’ kikona kiza napi-in Pasian in amau’ thungetnate don lo hi.

¹³“Sun khuavak a nial, tua khuavak thuzia a thei lo, khuavak lampi a pelh mi pawlkhat om hi.

¹⁴A zawng a cimawhte a thatlum dingin khuavak ma-in mi that pa kuankhia a, zan khuamial hun sungin mite’ na a guksak hi.

¹⁵Numei tunga a mawh mipa in khuamial ding ngakin om a, mite’ theih loh dingin ama mel a seel hi.

¹⁶Gutate in sun sungin a ciamtehsa teng zanin a inn luh uh a, sun sung bu-in khuavak a peel uh hi.

¹⁷Bang hang hiam cih leh zan khuamial pen amaute khempeuh a dingin zing khuavak bang hi a, zan khuamial lauhuai sung nuam a sa uh hi.

¹⁸“Tua bang migilo peuhpeuh tuikhang in taai a, ama neih leitangte Pasian in samsia a, tua leenggui lote-ah nasemin kikuan nawn lo hi.

¹⁹Nisat hun le khuakhal hunin vukkhalte a manthan bangin mihingte’ gam sung panin mawhnei mi a mangthang hi.

²⁰Amah kiphawkkha nawn lo a, ama nu nangawn in zong a mangngilh ta hi. Thante in amah netum a, amah maimang ta hi.

²¹Bang hang hiam cih leh tua bang mite, numei taciingte’ neihsa tawh a kivak uh hi a, meigongte’ phattuamna ding bangmah bawl lo uh hi.

²²Pasian in a thahatna tawh mi vangliante susia a, amah a gamtat ciangin migilo pa a si pah hi.

²³Pasian in a lungnuamin amah nungtasak a, ahi zongin Pasian in amah encik tawntung hi.

²⁴Migilo pa tomkha sung a liat hangin kiak bangin vulkik pah a, a kisattan ankung bangin a keu pah hi.

²⁵Hih thu kua in nialzo ding na hi uh hiam? Ka thugennate man lo hi, ci-in kei langah hong pangin ka thugente hong selzo ding kua om na hi uh hiam?” a ci hi.