Read Tedim Chin JOB 27 Bible Online

JOB 27 - Tedim Chin bible

JOB 27

¹Tua ciangin Job in thu genkik a,

²“Keima dikna a hong seelcipsak Pasian, ka lungsim a hong gimsak Vanglian Pasian a nungta ahih mah bangin,

³ka sungah nuntakna a omlaiteng, Pasian’ hu, ka nakah ka diik laiteng,

⁴ka muk tawh thusia peuhmah ka gen het kei ding a, ka kam tawh zuauthu peuhmah ka gen het kei ding hi, ci-in ka kiciam hi.

⁵Note a thuman hi, kong ci ngei kei ding a, ka nuntak laiteng, kei a thuman hi’ng, ka cihna thu ka khia ngei kei ding hi.

⁶Kei thuman ka kisakna ka khia ngei kei ding hi. Ka lungsimah kisuanna om loin siang mahmah hi.

⁷“Kei a hong langpan’, kei a hong dote in migilo le thuman lote bangin gimna thuak ta uh hen.

⁸Pasian in amaute’ nuntakna a laksak hun ciangin, migilote a dingin lametna om nawn ahi hiam?

⁹Lungkhamna a thuak uh ciangin Pasian in amau’ kikona awging ngai ding ahi hiam?

¹⁰Pasian’ piak ding lungdamna a deih ding uh kilawm ahih manin, ama tungah thu a nget tawntung ding uh a kilawm ahi hi.

¹¹“Pasian’ vangliatna bangzahin lian mahmah cih hong gensak unla, Vanglian Pasian’ geelsa teng hong laktelsak dih un.

¹²Ahi zongin tuate khempeuh na theih khitsa uh ahi hi. Tua ahih ciangin bang hangin mawk pau na hi uh hiam?

¹³“Vanglian Pasian in migilote, mi ngongtatte, gim a piakzia hih bang ahi hi.

¹⁴Tapa tampi a neih hangun, a vekpi-in gal sungah si mangkhin ding uh hi. A tate uh a tawntungin gilkial niloh ding uh hi.

¹⁵A nungta laisunte zong pulnatna tawh si ding uh a, meigong numeite in misite kahzo nawn lo ding uh hi.

¹⁶Migilote in kuama simzawh loh ngun tampi tak nei ding uh a, genzawh lohin nikten’ puansilh ciang venvan ding uh hi.

¹⁷Ahi zongin mihoih pawlkhat in tua puante silhin, thuman mi pawlkhat in tua ngunte tang lel ding uh hi.

¹⁸Migilote’ lam innte kho lo a, maimom bu, ahih kei leh lo honna buk tawh kibang lel hi.

¹⁹Amaute a hausa-in lum uh a, ahih hangin a khanlawh uh ciangin a hauhna teng uh na maimang ta hi.

²⁰Lauhuaina in tuikhang pak bangin nawkgawp ding a, zan ciangin huihpi in amaute mutkhiamang ding hi.

²¹Nisuahna huihpi in amaute leenkhia-in a inn panun gamlapi-ah leenkhia ding hi.

²²Amaute a suahtak theih nading a hanciam tantan kimlai mah, hehpih ngaihsut hetloin leenkhiamang ding hi.

²³Amaute a tai laitakun huih in nawk gawpin, a susiagawp dingin mutkhiagawp ding hi.