Read Tedim Chin JOB 28 Bible Online

JOB 28 - Tedim Chin bible

JOB 28

¹“Ngun a kitawh khiatna a khuk om a, kham a kisiansakna a mun mah om hi.

²Mihingte in lei sung panin sik tokhia a, suang sung panin sumsan a huantui uh hi.

³Mihingte in khuamial thukpen sung zongin, lei sung a thukpi dong hahkatin zong uh a, khuamial thuktawng sung pan suang a tokhia uh hi.

⁴Mihingte’ tenna panin a gamlapi mun, kuamah a pai ngei lohna sungah lei sung sumte a tokhia uh hi. Tua lai munah amau guak in na semsem uh a, lei thuk sungah khauhual tawh kiveisuk kiveito uh hi.

⁵I annek dingte leitungah hong pokhia a, ahi zongin leinuai thuk sung mei bangin a sa mahmah hi.

⁶Lei sunga om suangte sungah sapfaia suangmanpha om a, a leivuite sungah kham a om hi.

⁷Simbung in zong tua lampi thei ngei lo a, luimu zong tua lai-ah va leng ngei lo hi.

⁸Humpinelkai ahi a, ganhing dangte ahi zongin cikmah hunin tua lai-ah va pai ngei lo uh hi.

⁹“Mihingte in suang a sakpente to uh a, mualte’ bul lei sung panin a tokhia uh hi.

¹⁰Suangte a tawhvang uh ciangin suangmanphate a mu uh hi.

¹¹Amaute in tuinak kipatna dong lei sung to uh a, a kiphumcip nate hong suahkhia uh hi.

¹²Ahi zongin koi lai-ah pilna kimu ding ahi hiam? Koi lai-ah thutheihna nak om ahi hiam?

¹³“Mihingte in a kimuhna ding a lampi thei lo uh a, mihingte’ gam sungah zong a lampi om lo hi.

¹⁴A thuk mahmah tuipi liante in, ‘Ko’ sungah om lo hi,’ ci uh a, tuipite in, ‘Ko kiangah om lo hi,’ a ci uh hi.

¹⁵Pilna pen kham tawh a kileizo hi lo a, a man ding zah zong ngun tawh sehtheih hi lo hi.

¹⁶Ofir kham tawh pilna a kileizo hi lo a, suangmanpha pen tawh zong a kileizo hi tuan lo hi.

¹⁷Pilna a manphatna kham le limlang tawh tehtheih hi lo a, kham hoihpen a kibawl nate tawh zong leizawh hi lo hi.

¹⁸Pilna a manphatna suangkhi le limlang tawh genteh theih hi lo a, pilna themkhat bek nangawn kep sangin manphazaw lai hi.

¹⁹Ethiopia gamah a piang topaz suangmanphate tawh tehtheih ding hi lo a, kham citak hoihpen tawh zong kiteh thei tuan lo hi.

²⁰“Tua ahihleh koi lai panin pilna hong piang ahi hiam? Thutheihna koi lai-ah om ahi hiam?

²¹Nuntakna a nei sung pan a mu thei kuamah om lo a, a leengthei vasate nangawn in mu thei lo uh hi.

²²Sihna le siatna nangawn in a thu hemzak bek ung, ci lai uh hi.

²³“Pasian bek in pilna lampi thei a, amah bek in a omna mun a thei hi.

²⁴Bang hang hiam cih leh amah in leimong dong mu a, vantung nuai-ah a om na khempeuh a mu thei hi.

²⁵Pasian in huih a gik ding zah bawlin, tuipi a liatna ding zah a seh laitak,

²⁶guah zukna ding mun thu pia-in, khuaphialep in a zuih ding lampi bawlin a vaihawm laitak nangawnin,

²⁷amah in pilna mu-in a manphate entel a, amah in hoihsa ahih manin a kipsak hi.

²⁸“Tua ciangin amah in mihingte tungah thu genin, ‘Topa zahtakna, pilna hi a, siatna pelhna pen thutheihna hi,’ ci hi,” a ci hi.