Read Tedim Chin JOB 29 Bible Online

JOB 29 - Tedim Chin bible

JOB 29

¹Tua ciangin Job in a thu genkik a,

²“Ka nuntakna nidanga bang hi kik hen la, Pasian in kei hong et hun lai bang hong hi kik leh ka ut hi.

³Tua hun lai-in Pasian in kei hong ompih tawntung a, khuamial sungah ka pai laitakin khuavak hong pia hi.

⁴Tua hun pen ka cihtheih hun laitak hi a, Pasian in ka innkuan a hong hut laitak hun ahi hi.

⁵Tua hun lai-in Vanglian Pasian in kei hong ompih a, ka kimkotah ka tate a om uh hi.

⁶Ka bawngte le ka keelte in nawi deih zahzah hong pia uh a, suang tam penna nangawnah ka oliv kungte hoih mahmah hi.

⁷Khuasung upate a kikhop uh ciangin a kikhawm dingin kei ka pai ciangin

⁸kei hong muh phetun khangnote in tutna hong awn uh a, kei hong zahtakna limun papite na ding uh hi.

⁹Khuasung uliante a kiho na khawl pah uh a, a khut uh tawh a kam uh na hum uh hi.

¹⁰Mi a thupi pente nangawn na gamdai pah uh a, kuamah pau loin na om uh hi.

¹¹“Ka thugen a za mi peuhmah in a hoihlamin na za uh a, a hong mu mi peuhmah in dik hong sa uh hi.

¹²Mizawng ka theih peuhmah ka huh tawntung a, cih nading thei lo tagahte zong ka huh hi.

¹³A lungkham a cimawhte in kei hong phat uh a, meigong numeite a lungnuamin ka omsak hi.

¹⁴Thuman, puan bangin ka silh a, thuman in kei hong tuam hi. Thutang, puanpi-in ka silh a, thutang in kei hong tuam hi.

¹⁵Mittaw mite a dingin mittang ka hi a, khebai mite a dingin khe ka hi hi.

¹⁶Mizawngte a dingin a pa uh ka hi a, lungkhamna a thuak, ka theih loh mite nangawn ka panpih tawntung hi.

¹⁷Migilote’ gitlohna khempeuh ka susia gawpmang a, amau’ sukgawp mi khempeuh ka honkhia hi.

¹⁸“Ka nuntak kum sehnel zahin a tam dingin ka ngaihsun a, lungnuam takin inn-ah a si dingin ka kilamen hi.

¹⁹A zung in tui a ngah tawntung singkung tawh ka kibang a, daitui in a hiangte a nomsak singkung tawh ka kibang hi.

²⁰Mi khempeuh in kei hong phat tawntung uh a, ka tha a hat tawntung hi.

²¹Mite in ka thugen ngai-in hong ngak dimdem uh a, kuamah pau hetloin limtakin hong ngai uh hi.

²²Thu ka gen khit ciangin a genthuah ding uh bangmah thei nawn lo uh a, ka thugente khempeuh hoihtakin na sang pah uh hi.

²³Lo khote in khuapi guah deih mahmahin a ngak bangin, ka thugente khempeuh hoihtakin na sang uh hi.

²⁴Itna tawh ka nuihsat ciangin amaute lungnuam mahmah uh a, ka mai a tai ciangin a maigumna uh a bei hi.

²⁵Amaute ukin a vai ding uh ka hawmsak a, kumpipa in a galkapte a makaih bangin ka makai a, a lungkham uh ciangin amaute ka hehnem hi.