Read Tedim Chin JOB 3 Bible Online

JOB 3 - Tedim Chin bible

JOB 3

¹Hih bang teng khit ciangin Job in thugen hong kipan a, mihingin a pian’ ni a samsia hi.

²Tua ciangin Job in,

³“Ka suah ni, le ‘Pasal naungek khat kipaii hi,’ a kicih zan beimang hen!

⁴Tua ni khimzin’ ni suak hen! Vana Pasian in phawkin nei kei hen la, tua ni-in khuavak taang kei hen.

⁵Khuaniim, khuamial in khuhcip hen. Tua ni-in meiipi zing hen la, tua ni awk in valhtum hen.

⁶“Tua zan, khuamial sahpi in mancip hen! Kum khat sunga nidangte tawh kisim khawm kei hen la, kha khat sunga nidangte lakah kiseh khawm kei hen.

⁷Tua zanin ta piang kei hen la, lungdam otna awging tua zanin ging nawnkei hen.

⁸Phuisamna tawh awle a khiim thei, a mitphial tawh tuipi ganhing a hencip thei mite in tua zan samsia tahen.

⁹Tua ni zingsang aksite mial hen. A vak ngei lo ding khuavak ngak niloh hen la, zingsang phalvak mu ngeikei hen;

¹⁰bang hang hiam cih leh kei hong kipaiina naugil na khakcip lo a, kei’ muhna panin lungkhamna hong hepkhiatsak lo hi.

¹¹“Bang hangin a sisa-in suak hoh lo a, bang hangin ka suah phetin si pah hoh lo ka hi hiam?

¹²Bang hangin ka nu’ khuk tungah hong kitawi se a, ka nu’ nawi hong kiteepsak se ahi hiam?

¹³Tua hi zenzen kei leh hanah nuamtakin ka lum hithiat khin ding hi. Sihna sungah ihmu-in ka tawlnga khin ding a,

¹⁴inn hoihnono a lam kumpite le uliante,

¹⁵ngun le kham tawh a kidim a hau a liante tawh nuamtakin hanah ka tawlnga khinta ding hi.

¹⁶Bang hangin a hun cing lo-a suakte bang, khuavak a mu man loin a si naungekte bangin hong kiseelcip hoh lo ahi hiam?

¹⁷Tua lai-ah migilote in hong sukha nawn lo ding a, a gim mite tawlnga hithiat ding hi.

¹⁸Tua lai-ah galmat salte in nopna ngah ding a, nasem ukpa’ awging za nawn lo ding uh hi.

¹⁹Tua lai munah milian mineu omkhawm a, silate nangawn a topa’ kiang pan suakta hi.

²⁰“Bang hangin lungkhamna a thuak mipa, a nuntakna haksa a sa mahmah mipa,

²¹sih ding lunggulh ngeungau napi, a si thei lo, sum phum zon sangin sih ding a lim zonzaw,

²²han sung a tun ciangin a nuam mahmah, hankhuk a tun ciangin nuam lua-in a dianggawp mite, khuavak a mu dingin mi-in piang laizang ahi hiam?

²³Bang hangin mailam thu ding a thei lopi-in a mot om ding, a kimkotah Pasian in daai a khaknelh mipa, mi-in piang zenzen ahi hiam?

²⁴Bang hang hiam cih leh khuisatna, ka annek suak a, ka tauna, luipi ging bang hi.

²⁵Ka kihtaktak thu ka tungah hong tung ta a, ka laulau thu, ka tuak ta hi.

²⁶Lungnopna, daitakin omna, ka nei kei hi. Lungkhamna in hong nawk niloh a, tawldam hun ka nei kei hi,” a ci hi.