Read Tedim Chin JOB 30 Bible Online

JOB 30 - Tedim Chin bible

JOB 30

¹“Ahi zongin tu-in, a pate uh kimanna a nei lo ka uite tawh tuu cing dingin a kuan dingin zong ka deih loh, kei sanga a khangnozawte in hong ciamnuih bawlta uh hi.

²Amau’ hatna khempeuh tu-in bei khinta ahih manin, amau’ hatna kei a dingin a kimanna om nawn lo hi.

³Amaute zawng mahmahin gilkial uh ahih manin gamlak singzung keu peuh teep lel ding uh hi.

⁴Amaute in singkungnote botin ne uh a, limna alna a nei lo poding zung nangawn a ne uh hi.

⁵Gutate otkhai-in a kidelh khiat bangin mite lak panin amaute kihawlkhia hi.

⁶Amaute pen hawkguam sung, leihawm sung, luihawm, le keenhawm sungah a ten uh a kul ahi hi.

⁷Ganhing bangin gamlakah amaute ham uh a, sawlkawm nuai-ah kilomin a omkhawm uh hi.

⁸Bangmahin a kimang lo hih bang misia honte, mite omna gam sung panin a kihawlkhia hi.

⁹Tu-in amaute in kei hong simmawh bawlin hong nuihsan uh a, amaute’ ciamnuihna bek ka suak khinta hi.

¹⁰Amaute in kei hong kih uh a, kei tawh tehna-in amaute hoihlua kisa uh a, amaute in ka maitang nangawn cil hong phih vial uh hi.

¹¹Pasian in hong zawngkhalsak, hong cimawhsak ahih manin amaute in a ut utun kei hong bawlsia uh hi.

¹²Amaute in hong simgawpin, kei hong taikhiasak uh a, ka sih theih nadingin ka mai-ah na pang uh hi.

¹³Ka suahtak theih nading lampi na khaktan uh a, kei suksiat ding hanciam uh a, amaute a kho ding kuamah om lo hi.

¹⁴Kei ka bukna leihawmah amaute hong tuaksuk uh a, kei hong sucipsuk uh hi.

¹⁵Launa tawh ka kidim a, ka cihtheihna khempeuh meii bangin a thengta hi.

¹⁶“Tu-in a si ding ka hita a, ka gimna panin noptuam ngahna ding bangmah om nawn lo hi.

¹⁷Zan thapai-in ka guh sung, ka tang sung khempeuh na a, a hong pet tawntung natna dai ngei peuhmah lo hi.

¹⁸Pasian in ka puan ngawng pan kei hong manin ka puan tawh hong heekcip hi.

¹⁹Buannawng ciim sungah kei hong lawnkhia a, ninbulom bang lel ka hita hi.

²⁰“Pasian aw, nang kong sam a, na hong dawng ngei kei hi. Nang tungah thu kong ngen a, nong don het kei hi.

²¹Kei tungah nong gilo mahmah a, nong hih theih zahin kei na hong bawlsia hi.

²²Huih lakah na hong lawn a, huih na hong leensak a, huihpi in hong lawnsuk hong lawnto hi.

²³Mi khempeuh a dingin sehkholhin a kikoihsa sihna-ah a hong paipih na hihna ka thei hi.

²⁴Na hehpih ding a hong thum ding cih lohbuang, bangmah dang a hih thei nawn lo misia pa, bang hangin sugawp na hi hiam?

²⁵A lungkham mite tawh kei kap khawmin, a cimawh mite dahpih hi lo ka hi hiam?

²⁶Lungdamna le khuavakna ka lamet laitakin, lungkhamna le khuamialna hong tung zawsop hi.

²⁷Lunggimna le natna in kei hong sugawp a, gimna ka thuak ding cih loh bangmah dang om nawn lo hi.

²⁸Lungkham sinkhamin ka om a, mihon lakah dingin huhna ka ngen hi.

²⁹Kei pen gamkhing sunga a om ngia le vasa-kalaohte tawh kipawlin a kikhawl ka hita hi.

³⁰Ka vun vomin dulhkhia a, ka pumtangin ka ci sa gawp hi.

³¹Nidangin lungdamna la a kisa ka zakna munah tu-in thumna le kahna aw bek ka za ta hi.