Read Tedim Chin JOB 31 Bible Online

JOB 31 - Tedim Chin bible

JOB 31

¹“Lunggulhna tawh nungak khatpeuh ka et ngei loh nading, kiciamna ka bawlkhin hi.

²Vanglian Pasian in eite bang hong cih a, mihingte’ gamtatna bangci thuhkik ahi hiam?

³A man loin a gamtate tungah siatna le gimna a tungsak hi.

⁴Pasian in ka gamtatna khempeuh thei a, ka kalsuanna khempeuh a hong mu hi.

⁵“Ka gitloh gamtat ngei lohna, kuamah ka khem ngei hetlohna, ka gamtat hoihna thute-ah ka kiciam ngam hi.

⁶Pasian in tawikhaina manah hong tawikhai hen; ka paubaan hetlohna hong mu ding hi.

⁷Lampi man panin ka pial a, siatna lam ka zuih a, ka khut tungah mawhna a baan taak leh

⁸ka khawhsa ante midangte’ nek suak hen la, ka an neih khempeuh maimang tahen.

⁹“Ka vengte’ zi zawlmitin, a kong gei-ah ngakin ka buk taak leh

¹⁰ka it ka zi in midangte’ an suksak hen la, midangte’ ang-ah lum tahen.

¹¹(Tua bang mawhna pen a siahuai hi a, sihna a thuak ding ahi hi.

¹²Ka neih khempeuh a kangtum thei mei husia tawh a kibang ahi hi.)

¹³“Ka nasemte khat peuhpeuh kei tungah hong phun ciangin, ama thu ngai-in limtakin ka bawl hi.

¹⁴Tuaci kei leng, Pasian’ mai mu ngam ding ka hi hiam? Keima thu a khen dingin Pasian hong pai ciangin bang gen mawk ding ka hi hiam?

¹⁵Kei a hong piangsak Pasian mah in keima nasemte zong a piangsak ahi hi.

¹⁶“Mizawngte ka huh ding ka mangngilh ngei kei a, meigong numeite ka guaksuaksak ngei kei hi.

¹⁷Keimah in an ne napi-in, tagahte a gilkialin ka koihkhong ngei kei hi.

¹⁸Ka khang tawntungin tua bangte ka en tawntung hi.

¹⁹“Mi a cimawh, puan silh ding a lei zo lo, a zawng lua ka muh ciangin,

²⁰ka tuuhon panin ka ngah tuumul puan kibawl ka pia hi. Amah in zong a lungsim neih khempeuh tawh kei a hong phat hi.

²¹“Zum thukhenna-ah zo-na ning cih ngaihsutna tawh tagah khatpeuh ka khem taak leh,

²²ka khutte buisum hen la, ka liang bul panin kilongkhia tahen.

²³Pasian’ gimpiak ding kihta ka hih manin, tua bang peuhmah ka gamta ngei kei ding hi.

²⁴“Leitung hauhna muan le suanin ka nei ngei kei a,

²⁵ka hauhna zong ka kisaktheihpih ngei kei hi.

²⁶A taang mahmah ni ahi a, a hoih mahmah kha ahi zongin, cikmahin ka bia ngei kei hi.

²⁷Tuate pahtawina le zahtakna limin ka khut lapna tawh cikmah hunin ka khial ngei het kei hi.

²⁸Tua bang mawhna in sihna a thuak ding hi a, tua bang mawhna pen Vanglian Pasian nialna ahi hi.

²⁹“Ka galte’n gim a thuak teh ka kipak ngei kei a, haksatna a tuah uh teh ka lungdam ngei kei hi.

³⁰A sih ding uh deihna tawh ka samsia ngei kei hi.

³¹Zin le leengte limtakin ka do tawntungna thu ka na a hong sepsak mi khempeuh in a thei uh hi.

³²Khualzin mi khempeuh ka inn-ah ka tungsak tawntung a, kongzing lakah amaute ka lumsak ngei kei hi.

³³Midangte in a mawhnate uh pulak loin imcip uh a, ahih hangin keima mawhna cikmahin ka im ngei kei hi.

³⁴Midangte’ hong kam pau ding kihtakin ka nei ngei kei hi. Amau’ hong simmawh ding ka kihtakna hangin pau loin ka om ngei kei a, ka bucip ngei kei hi.

³⁵“Ka thugente kuamah in na ngai lo ding ahi hiam? Ka gen thu khempeuh man hi, ci-in ka kiciam hi. Vanglian Pasian in kei hong dawng tahen. “Ka langte in kei hong mawhsakna thute ka tawi theih dingin lai sungah a kigelh hileh

³⁶tua mawhsaknate kisialhna tawh ka ngawngah ka ok ding a, mi khempeuh in a muh dingin ka sangsak ding hi.

³⁷Ka gamtatna khempeuh Pasian kiangah ka gen ding a, ama muhna-ah lungdamin kihihsakna tawh ka om ding hi.

³⁸“Ka khawh leitang ka guk ahih a, a nei taktak pa’ tung pan ka suh ahih a,

³⁹tua leitang a piang ante ka nek a, tua lo a khote a puksi-in ka omsak taak leh,

⁴⁰tua lo sungah mangbuh le mangbuh ham tangin kiak le ling po ta hen,” a ci hi.