Read Tedim Chin JOB 32 Bible Online

JOB 32 - Tedim Chin bible

JOB 32

¹Job amahmah dik kisa tawntung ahih manin hih mihing thumte in Job’ thugente dawn ding ngaihsun nawn lo uh hi.

²Ahi zongin a thu a za, Ram minam, Buz-te beh, Barakhel’ tapa Elihu a heh hong suak hi. Bang hang hiam cih leh Job amah kidiksakin Pasian mawhsak zawsop hi.

³Job’ lawm thumte tungah zong a heh suak hi. Bang hang hiam cih leh Job a dawnna ding uh thei lo uh ahih manin Pasian a khial tawh hong kibang hi.

⁴Elihu ahihleh amaute lak panin a khangno pen ahih manin adangte a pau kim khit mateng bangmah pau loin a om hi.

⁵Ahi zongin hih mihing thumte in Job a dawn theih loh a muh ciangin a hehna thuakzo nawn lo hi.

⁶Tua ahih ciangin Buz-te beh Barakhel’ tapa Elihu in thu gen ding hong kipan a, “Kei a khangno lai hi-in, note a khangham na hih manun, ka ngaihsutna note lakah kong gen ngam kei hi.

⁷No a khangham zawte in thu a gen ding kilawm hi, ci-in ka ngaihsun hi.

⁸Ahi zongin mihingte tungah a hong tung pilna pen Vanglian Pasian’ kha in a hong piak ahi hi.

⁹Khanghamna in mi pilsak lo a, thuman zong theisak tuan lo hi.

¹⁰Tua ahih ciangin tu-in keima thugen dingte nong ngaih ding uh ka deih hi. Keima ngaihsutna hong gensak dih un.

¹¹“Thu na gengen laitakun lungduai takin kong ngaingai a, na thugen dingte uh na zonzon laitakun ka hong ngak hithiat hi.

¹²Limtakin kong ngai a, na cihmawhna uh ka thei hi. Job’ thugente a man lohna na gentel thei kei uh hi.

¹³Bang hangin pilna a nei-in kigen thei ding na hi uh hiam? Note in lel na hih manun Pasian in Job dawng ding hi.

¹⁴Job in note tungah thu tampi hong gen a, kei tungah hong gen lo hi. Ahi zongin note’ dawn bangin ka dawng ngei kei ding hi.

¹⁵“Job aw, hih mite in nang hong lel uh a, nang hong dawnna ding bangmah thei lo uh hi.

¹⁶Amaute pau loin a om ciangun kei zong pau loin ngak lailai ding ka hi hiam? Amaute in a gen ding uh thei nawn loin ommawk uh hi.

¹⁷Tu petpetin kei zong nang kong dawng ding a, keima ngaihsutnate ka hong pulak ding hi.

¹⁸Thu a gen dingin kha in kei hong sawl a, tu taktak ciangin ka kam ka ki-ipzo nawn het kei hi.

¹⁹Thugen theih nading hun a nei lo hi leng, leenggahzu thak a kithun leenggahzu um bangin ka puakkham ding hi.

²⁰Ka thuakzo nawnkei a, ka genkhia ta ding hi.

²¹Hih ka thugenna-ah kuamah ka pawlpih kei ding a, kuamah phattuam ka nei kei ding hi.

²²Kuamah ka mawkphat thei kei hi. Tuaci mawkphat leng Pasian in kei hong sumang pak ding hi.