Read Tedim Chin JOB 33 Bible Online

JOB 33 - Tedim Chin bible

JOB 33

¹“Job aw, tu-in ka thugen khempeuh limtakin hong ngai in.

²Ka lungsim sunga om thute a hong gen ding ka hi hi.

³Ka gen khempeuh lungsim takpi tawh ka gen hi a, a man thu a gen ka hi hi.

⁴Bang hang hiam cih leh Pasian’ kha in kei hong sawl a, Vanglianpa in kei tungah nuntakna hu hong pia hi.

⁵“Na hong dawn theih leh limtakin hong dawng in. Na hong seelna ding limtakin kiging in.

⁶Job aw, nang le kei, Pasian’ hong muhna-ah a kibang ihi a, i nih tuakin leivui pana piang ihi hi.

⁷Tua ahih manin kei nong kihtakna ding bangmah thu om lo a, nang ka hong zawhthawh bawlgawpna ding zong bangmah thu om tuan lo hi.

⁸“Keima zakin thu na gen khin a, na thugente ka za khin hi.

⁹Nang in, ‘Kei ka mawh kei a, ka gamta khial kei hi. Ka paubaang kei a, mawhna ka sukha kei hi.

¹⁰Pasian in kei hong sukna ding thu zongzong a, gal bangin kei hong bawl hi.

¹¹Amah in ka khe kolbulh a, ka gamtatna khempeuh hong encik hi,’ na cihna ka za hi.

¹²“Ahih hangin, Job aw, nangmah na khialzaw hi. Pasian pen mihing sangin lianzaw hi.

¹³Pasian in mihingte’ phunna thudon ngei lo hi, ci-in thugenna tawh bang hangin Pasian mawhsak na hi hiam?

¹⁴Pasian in a lam tuamtuamin thu hong gengen napi-in, ama thugente khempeuh kuamah in thudon lo hi.

¹⁵Zanin mite a ihmut ciangin, mang le maangmuhna sungah Pasian in thu a gen hi.

¹⁶Pasian in thu hong gen a, ama hilhkholhna hangin mite lau mahmah uh hi.

¹⁷Mite in khialhna a bawl nawn lohna ding, mi kiphasakte a suahkhak loh nading, Pasian in a deihna hangin mite kiangah thu a gen hi.

¹⁸Pasian in mihingte siatna thuaksak lo a, sih nading panin amaute a honkhia hi.

¹⁹Pasian in cinatsakna tawh mihingte thuhilh a, a pumpi khempeuh natna tawh a kidimsak hi.

²⁰Cina pa in an ne zo lo a, an limpen nangawn a kih tha a suak hi.

²¹A ci a sa khempeuh kiam a, a guh guak bekin a om hi.

²²A beina ding a nai hita a, misi gam a zuan ding hita hi.

²³“Mihingte’ tavuan a phawksak, Pasian’ vantungmi tul tampite lak panin vantungmi khat amah a huh dingin hong paikhia ding hi.

²⁴Vantung mi in amah a hehpihna hangin, ‘Amah suaktasak in. Misite gamah paisak kei in. Amah tatkhiatna ding hih lai-ah om hi,’ a ci ding hi.

²⁵Tua ciangin ama pumpi khangnosuak kikin, a thahat pen hun laitak a bangkik ding hi.

²⁶Tua ciangin Pasian in ama thungetna pia ding a, amah in lungdamna tawh Pasian bia ding a, Pasian in ama a dingin thu a hoihlamin a heisakkik ding hi.

²⁷Tua ciangin amah in mihonpite’ zakna-ah, ‘Kei ka khial khin hi. A manin ka gamta kei a, ahi zongin Pasian in kei hong suaktasak hi.

²⁸Misite’ gam sung ka tunna ding panin amah in kei hong kem a, tu-in kei ka nungta lai hi,’ a ci ding hi.

²⁹Pasian in hih thute khempeuh mihingte tungah hong hihkik zelzel a,

³⁰sih nading panin honkhia kik zelin nuntak nuam a pia kik hi.

³¹“Job aw, ka thugente limtakin hong ngai in. Gamdai-in om inla, kei thu hong gensak in.

³²Ahi zongin gennop mahmah na neih leh hong gen in; bang hang hiam cih leh midik na hih ding ka hong deihsak hi.

³³Ahi zongin gennop velvel na neih khol kei leh keima thugen hong ngai in. Mipil na hih theih nading thu kong hilh ding hi,” a ci hi.