Read Tedim Chin JOB 34 Bible Online

JOB 34 - Tedim Chin bible

JOB 34

¹Tua ciangin Elihu in,

²“No a pilin a kinei mite aw, ka thugente ciamteh un. Thu thei a a kinei mite aw, ka thugente ngai un.

³An na ciap uh ciangin a lim a lim lo na thei uh hi. Thu kigen na zak uh ciangin pil kampau le hai kampau na khenthei uh hi.

⁴Thuman bang hiam cih tengkhia ni. Thuhoih bang hiam cih mukhia ni.

⁵Job in, ‘Kei ka dik hi. Pasian in kei a thumanin hong seh nuam lo hi.

⁶Kei a thuman hinapi zuauthu genin hong seh hi. Kei a khial hi lo napi gim thuakin ka cimawh hi,’ a ci hi.

⁷“Hih Job tawh a kibang mi na mu ngei uh hiam? Amah in Pasian zahtakna lim bangmah nei het lo hi.

⁸Amah in migilote tawh kikholh nuam sa mahmah a, mawhnei mite tawh a vak kawikawi hi.

⁹Bang hang hiam cih leh amah in, ‘Pasian’ deihna i zuih hangin phattuamna bangmah om lo hi,’ ci hi.

¹⁰“Ahi zongin thu ngaihsun thei a kinei note khempeuh in ka thugenna hong ngai un. Pasian a giloin gamta ngei ding a, Vanglianpa in a man loin sem ngei ding ahi hiam?

¹¹Pasian in a gamtatna tawh kizui-in mite tungah thaman pia a, a thuak dingun a kilawm bangin gim a pia hi.

¹²A taktakin ci lehang, Pasian a man loin gamta ngei lo a, thutang kimlai a khialin heisak lo hi.

¹³Pasian in ama vangliatna mi khatpeuh tung panin a ngah ahi hiam? Leitung khempeuh a uk dingin mi khatpeuh in amah a koih ahi hiam?

¹⁴Pasian in ama ngaihsutna kheel hen la, nuntakna hu a dokkik hileh

¹⁵nuntakna a nei khempeuh si pah ding uh a, mihing khempeuh leivui suakkik ding uh hi.

¹⁶“Job aw, mipil-a kinei na hih leh ka thugente hong ngai in.

¹⁷Vanglianpa in thutang a deih lo dingin ngaihsun na hi hiam? Nang in a thuman Pasian mawhsak na hi hiam?

¹⁸Kumpite le uliante bangmahin kimang loin a gitloh uh ciangin, amaute a mawhsak ngam pa Pasian bek ahi hi.

¹⁹Pasian pen mi khempeuh a hong piangsak pa hi a, amah in uliante panpih tuan nei lo a, mizawngte sangin mihaute thupi ngaihsutzaw tuan lo hi.

²⁰Mihingte ahihleh zan khat thu-in sipak thei hi. Pasian in mite satpukin sisak thei a, nakpitakin hih kul loin mi thahat pente zong a that thei hi.

²¹Pasian in mihingte’ gamtatna khempeuh hong encik a, i kalsuanna themno dongin hong mu khin hi.

²²Gamtatsia mite a buk theih nadingun a seelcipzo ding, khuamial khuazing koimahah om lo hi.

²³Pasian’ mai-ah mihingte in thukhenna a thuak ni ding, a kiseh hun omtuam lo hi.

²⁴Amah in a thu kan kul loin mi vangliante sugawp a, amaute’ tang dingin midangte a koih hi.

²⁵Amah in amaute’ gamtatnate a vekpi-in thei ahih manin zan khat thu-in amaute lumletin a susiagawp hi.

²⁶Pasian in mi khempeuh’ muhin mawhneite gim a pia hi.

²⁷Bang hang hiam cih leh amaute in ama thu mang nawn lo uh a, a thupiakte khempeuh don nawn lo uh hi.

²⁸Amaute in mizawngte kapsak gawp uh a, mizawngte’ huh ngetna awging Pasian in a za hi.

²⁹“Pasian in bangmah hih het kei taleh zong, kuamah in Pasian mawhsak thei lo ding hi. Amah in hong maingat hetkei taleh zong, kuamah in bangmah cihthei tuan lo ding hi.

³⁰Migilote hong uksak taleh zong, tua panin suahtakna ding kuamah in vaihawm zo lo ding hi.

³¹“Job aw, Pasian’ tungah na khialhnate pulakin na khialh nawn loh nading thu ciam nai lo na hi hiam?

³²Pasian in na khialhnate a hong lahna ding ngenin, na gamtatsiat nawn loh nading ut nai na hi hiam?

³³Pasian nial na hih manin amah in nangma utna a bang hangin hong hihsak ding ahi hiam? Hih thu pen kei’ ngaihsut ding hi loin, nangma khensat ding ahi hi. Tu-in nangma ngaihsutna a kician takin hong gen in.

³⁴“Thu a ngaihsun theite in hih thu man hi, hong cihpih ding uh a, ka thugenna a za mipil peuhmahte in,

³⁵‘Thu a thei lopi-in Job in thu gen a, a thugen peuhmah a khiatna nei om lo hi.

³⁶Job’ thugente khempeuh ngaihsun le-uhcin, migilo bangin a kampauna na thei ding uh hi.

³⁷Amah a khialhna khawl nuam het lo a, eite khempeuh’ mai-ah Pasian simmawhin zahpih bawlgawp hi,’ hong ci ding uh hi,” a ci hi.