Read Tedim Chin JOB 35 Bible Online

JOB 35 - Tedim Chin bible

JOB 35

¹Tua ciangin Elihu mah in,

²“Job aw, Pasian’ muhna-ah ka paubaang kei hi, na cih ding kilawm lo hi.

³Pasian kiangah, ka khialh hangin bang phamawh sa na hi hiam? Khialhna ka gamtat loh manin bangmah phattuamna ka ngah kei hi, na cih ding kilawm lo hi.

⁴Nang le na lawmte tungah thu ka hong gen ding hi.

⁵“Vantung ento dih un. Meiite bangzah takin sang omto ahi hiam?

⁶Mawhna na gamtat manin, Pasian bangmah sukha lo hi. Tampi tak khial talecin zong amah sukha tuan ahi hiam?

⁷Na thumanna hangin Pasian in phattuamna ngah ahi hiam? Pasian in nang kiang panin bangmah deih lo hi.

⁸Na khialhna hangin na mipihte bek in thuak a, na gamtat hoihna hangin na mipihte bek in phattuamna ngah hi.

⁹“Mite in gim a thuak ciangin tau uh a, amaute a honkhia dingin midang khatpeuh a sam uh hi.

¹⁰Lungzin’ hun laitakin thahatna a pia, amaute a Piangsak Pasian’ lam nga lo uh hi.

¹¹Eite mipilin a hong bawl, ganhingte le vasate sangin a pilzaw-in a hong bawl Pasian’ lam nga lo uh hi.

¹²Amaute migilo mi kihisakte ahih manun, huh ding a nget hangun Pasian in pia lo hi.

¹³Ngetnget, gengen, a phattuamna bangmah om lo hi. Vanglian Pasian in na mu lo, na ngai lo hi.

¹⁴“Job aw, nangmah in, ‘Pasian ka mu thei kei a, ahi zongin ka thu ama khut sungah om a, lungduai takin ka ngak niloh hi,’ na ci hi.

¹⁵Pasian in kuamah gim pia lo a, khialhna zong thupi ngaihsut lo hi, ci-in na ngaihsun hi.

¹⁶Tua banga kam na paupau a mawknapi hi a, na gen mel zong a thei het lo na hihna thu a hong kilangsak na hi hi,” a ci hi.