Read Tedim Chin JOB 36 Bible Online

JOB 36 - Tedim Chin bible

JOB 36

¹Elihu in a thugen zomlai a,

²“Lungduai takin tawmkhat hong ngailai in. Pasian’ tangin ka gen ding thu pawlkhat omlai hi.

³Kei a hong Piangsak Pasian thuman hi, ci-in kong lah nadingin thu tampi tak kaikhawmin ka hong gen ding hi.

⁴Ka thugente khempeuh a khial om het lo a, na mai-ah thugenpa pen mipil khat ahi hi.

⁵“Pasian a thahat mahmah hi napi-in, kuamah simmawh lo hi. Amah in a theih loh bangmah om lo hi.

⁶Amah in mimawhte daupaisak lo a, a zawng gimna a thuakte tungah a manin a gamta hi.

⁷Amah in thuman mite hu a, kumpi ukna za zong pia a, pahtawina lianpi a ngahsak tawntung hi.

⁸Ahi zongin mite sikkol kibulh a, a gamtatnasate hangin gimna a thuak uhleh,

⁹Pasian in amau’ mawhna le a kiphatsaknate uh a lakkhia ahi hi.

¹⁰A gamtatsiatna panun a khawl nadingun amau’ bil sungah thu a gengen hi.

¹¹Amaute in Pasian’ thu mangin ama na sem le-uh amaute nuamsa-in a khan uh a sau hi.

¹²Ahi zongin ama thu mang kei le-uh, namsau tawh si ding uh a, misite’ gam zuan ding uh hi.

¹³“Migilote a hehin nitum uh a, gimna a thuak ciang nangawnun ama huh ding ngen lo uh hi.

¹⁴Amaute khansih uh a, a zumhuaipi-in a bei uh hi.

¹⁵Ahi zongin Pasian in gimna tawh mite thuhilh a, khua a phawktheih nadingun gimna a zang ahi hi.

¹⁶Pasian in lungkhamna panin nang hong paikhiatpihin, lungnuam takin nang hong omsak a, na sabuai tungah anlim nono kilui venvan hi.

¹⁷Ahi zongin tu-in na ngah dinga kilawm gimna a thuakta na hi hi.

¹⁸Sumgolh’ khemsa-in gamta kei inla, leitung nate’ bawlin lam kipialsak kei in.

¹⁹Huh ding na nget hangin a phattuamna om nawn lo a, na hauhna na liatna in hong huh thei nawn lo hi.

²⁰Mihingte a beimang hun ding, zan khuamial hong tun hun ding lunggulh kei in.

²¹Siatna lamah na kihei khak lohna ding limtakin kidawm in. Na siat khak loh nadingin gimna hong kithuaksak ahi hi.

²²“Pasian a vangliat mahmahna limtakin phawktel in. Pasian pen sia khempeuh lakah sia lianpen ahi hi.

²³Pasian’ gamtatzia ding kuamah in sawl thei lo a, Pasian gamtatsia hi, ci-in kuamah in zong mawhsak zo lo hi.

²⁴Pasian a nasepna hangin mi khempeuh in a phat tawntung mah bangin nang zong amah phatzaw in.

²⁵Mi khempeuh in Pasian’ sepsate mu uh a, theikim zo lo uh ahih manin lamdang a sa uh hi.

²⁶Pasian a liatna a kicingin i theizo kei a, ama kum phazah zong i simzo kei hi.

²⁷“Amah in tuipi panin tuite lato a, tua a lak tuite guahtui-in a bawl hi.

²⁸Amah in meii sung panin guah piangsak a, mihing khempeuh a dingin guah a zusak hi.

²⁹Meiite a pai henhanna hitaleh, vanah van a ginna hitaleh kuamah in thei zo lo hi.

³⁰Amah in vantungah khua phiasak a, ahi zongin tuipi thuk sung a mialsak hi.

³¹Amah in tu-a bangin mihingte hong vak a, annek ding tampi tak a hong pia ahi hi.

³²Amah in keek thu pia a, a kap nop penpen a kha dingin a sawl hi.

³³Amah a heh ciangin huihpi sam a, vanging pen ama hong pai nading a kitheihna ahi hi.