Read Tedim Chin JOB 37 Bible Online

JOB 37 - Tedim Chin bible

JOB 37

¹“Hih huihpi in ka dip hong kuasak a, ka dip vana khai hong bangsak hi.

²Ama kam panin a hong gingkhia hih vanging Pasian’ pauna awging, limtakin ngai in.

³Amah in vanah khua phiasak a, leimong khat pan mong khat dong a taan hi.

⁴Tua ciangin a vanglian vanging, ama awging hong kiza a, tua hun sungteng mahin khua a phiaphia hi.

⁵Pasian’ sawlna tawh na lamdangpipi piang a, eite’ theih zawh loh thute a hong piang hi.

⁶Amah in leitungah vuk a kia dingin sawl a, guah tampi tak a zusak hi.

⁷Amah in mihingte a nasep uh khawlsak a, amah a gamtang ahihna a kilangsak hi.

⁸Gamsate in a lupna ngei delh uh a, a kua sungah bucip uh hi.

⁹Leitaw lam panin guahpi hong zu a, leilu lam panin huihpi hong nung hi.

¹⁰Pasian’ husanna in tuite khalsak a, tui lianpite khalin sik bangin a sak hi.

¹¹Amah in meiipi nomsak a, meiipi in khua a phiasak hi.

¹²Pasian’ deihna zui-in a kikhin kawikawi hi. Leitung mun khempeuhah pai-in, Pasian’ sawl teng a sem uh hi.

¹³Pasian in mihingte gim a piakna ding ahi a, pahtakna a lahna ding ahi zongin, leitungah tu-a bangin a piangsak hi.

¹⁴“Job aw, tawlkhat khawlin ngai inla, Pasian’ bawlsa na lamdangte ngaihsun dih in.

¹⁵Pasian in thu pia a, meii lak panin khua a phiatsak theihna na thei hiam?

¹⁶Bangmah in a len lopi-in vantungah meii a omsak theihna, a lamdang hih ama siamna na thei hiam?

¹⁷Leitaw lam huihpi nasia takin a nun’ laitakin na puan sungah khua-ul kai-in na om hi.

¹⁸Limlang bangin a sak mahmah van peekpi ama hih bangin zalzo na hi hiam?

¹⁹Pasian kiangah ka gen ding uh hong hilh in. A hawmpi-in ka om uh a, ka gen ding uh om lo hi.

²⁰Pasian tawh kiho theih nading ka ngen kei ding hi. Kei hong suksiat nadingin kei kipia ding ka hi hiam?

²¹“Tawlkhat sung khuavak kimu vet lo a, guah le meii in a liah hi. Tua ciangin huih hong nungin tuate khempeuh a mutsiang hi.

²²Kham mel khuavak leilu lam pan hong taang a, Pasian’ minthanna pen zahtakna tawh kidimsak hi.

²³Pasian vanglian mahmah a, eite’ theihzawh hi lo hi. Amah thuman mahmah a, thutang takin na a sem hi.

²⁴Tua ahih manin mi khempeuh in amah a zahtakna, mipil a kisate amah in a don lohna, lamdangsak ding hi lo hi.” a ci hi.