Read Tedim Chin JOB 39 Bible Online

JOB 39 - Tedim Chin bible

JOB 39

¹“Sathakte a suah hun ding thei ngei na hi hiam? Sakhite a suah laitakin nau va dom ngei na hi hiam?

²Tuate a ni ciamtehin, a suah hun ding uh thei na hi hiam?

³A no suak dingin lei-ah a bawhsuk hun laitak thei na hi hiam?

⁴A note gamlakah khangin, a nute kiang pan paikhia-in ciahkik nawn lo uh hi.

⁵“Kua in gam-late tungah suahtakna pia ahi hiam? Kua in khahin a ut utin vaksak ahi hiam?

⁶Amau’ om nadingin gamlak ka pia a, bangmah a po zawh lohna zanglei-ah ka tengsak hi.

⁷Gamlumna mun khuapite tawh a kigamla-ah om uh a, kuamah in zualsak zo lo a, na semsak zo lo uh hi.

⁸Mualte tungah an zongin vak kawikawi uh a, nektheih ding singkung lopa a hing peuhpeuh zuan kawikawi uh hi.

⁹“Gambawngtal in nangma na hong sem ding ahi hiam? Na ganbukah gambawngtal hong giak nuam ding ahi hiam?

¹⁰Nangmah in khauhual tawh khihzo ding a, na lo-ah na lokhawhna leeng kaisakzo ding na hi hiam?

¹¹Nasem dingin a hat mahmah hangin, nangma na hong sepsak dingin lamen ngam na hi hiam?

¹²Lo a na anpiangte hong kaihkhop sakin, na ancilna-ah an hong khawm dingin um na hi hiam?

¹³“Vasa-kalaohte in a kha uh bangzah takin nawh zap thei ahi hiam! Ahi zongin gun vapi bangin vasa-kalaoh leng thei lo hi.

¹⁴Vasa-kalaoh in leilakah a tui nusia a, a tuite a luumsak dingin leilak a ap hi.

¹⁵Mi khatpeuh in a khe tawh a tuite a sikkhap khak ding, gamsa khatpeuh in a sikkhap khak ding, phawk khollo hi.

¹⁶A tuite ama a’ bangin ngaihsun khollo a, ka gimnate a mawkna suakkha ding hi, ci-in lunghimawh lo hi.

¹⁷Amah a hai-in a bawlpa ama tungah pilna a guan lopa keimah ka hi hi.

¹⁸Ahi zongin a tai ciangin sakol sangin hatzaw hi.

¹⁹“Job aw, sakolte a hatsak pa nang na hi hiam? Sakol zaangmul a posak pa nang na hi hiam?

²⁰Sakolte kauphe bangin diangsak thei-in, mite’ kihtak dingin phitsak thei na hi hiam?

²¹Amaute in lawpna tawh a khe-un lei khuat uh a, a thaneih khempeuh uh tawh gal sungah a diang uh hi.

²²Amaute in launa mel bangmah thei lo uh a, namsau kihta-in nungkik cih zong om lo hi.

²³Amaute’ tungah a tuang mite’ galhiam, lum le teite a tee zalzal hi.

²⁴Lawp mahmahna tawh sakolte in mainawt uh a, peengkul a kitum ciangin omkhong thei lo uh hi.

²⁵Peengkul a kitum ciangin ham hathat uh a, gal mai a tun ma-un gal gimnam za uh a, galkapmangte’ thupiakna awging a za uh hi.

²⁶“Simbung in a kha zalin leitaw lamah a leentheihna ding nangma kiang panin hong sin ahi hiam?

²⁷Muvanlai in sang leenin mualtungah bu a tomna ding nang’ thupiakna hong ngak ahi hiam?

²⁸Suangpi dawnah bu bawl a, suangheeng kawmte phualpi-in nei hi.

²⁹Tua lai mun panin khuadak kawikawi a, manin a nek ding an a gal et hi.

³⁰Gan sihna kimkotah musanete kikhawm uh a, a note in sasi a dawn uh hi,” a ci hi.