Read Tedim Chin JOB 4 Bible Online

JOB 4 - Tedim Chin bible

JOB 4

¹Tua ciangin Teman khuami Elifaz in thu hong gen a,

²“Mi khatpeuh in thu hong genpih leh na heh ding hiam? Kua in a kam ipzo nawn ding ahi hiam?

³Lunghiang mite na hanthotna, khut kha ban kha mite na thakhauhsakna,

⁴a puk mite na thugenna tawh na kipsakna, khukzaw mite na hatsak ngeite ngaihsun in.

⁵Ahi zongin nang tungah tuate hong tung a, na thuakzo kei hi. Tuate in nang hong su a, na lungniam hi.

⁶Na biakna in hong hehnem zo lo ahi hiam? A paubaang lo, na nuntakna in lametna hong pia zo lo ahi hiam?

⁷Tu-in ngaihsun in: Midik kimlai kua sia ngei ahi hiam? A thutang mi a kisuksiatna koi-ah mu ngei na hi hiam?

⁸Mawhna bawlin buaina a piangsak mi in a gamtatna bangin a gah a atna ka thei hi.

⁹Pasian’ husanna tawh tua bang mite sia a, ama hehna in tua bang mite kangtum hi.

¹⁰Humpinelkai hawk bangin migilote’ hawkna dai ta a, Pasian in amaute’ ha suktansak khin ahih manin gamdai ta uh hi.

¹¹Annek ding a mu lo a thahat humpinelkai bangin amaute simang khin uh a, a tate uh kithehthang hi.

¹²“Tu-in kei kiangah thu khat hong tung khian a, ka bil in tua thu ginghiau a za hi.

¹³Mi a ihsip hun zankim laitak, zan mangmat hun laitakin

¹⁴launa le linna kei tungah hong tung a, ka pumpi linna in kei hong lausak hi.

¹⁵Huih in ka mai hong mut a, ka khuasikmul hong suaksak hi.

¹⁶A mel ka khen theih loh lim khat hong ding a, keima mai-ah mihing lim khat hong om a, tua ciangin aw un duadua khat ka za a,

¹⁷‘Pasian’ mai-ah mi khatpeuh paubaang loin omzo ngei ding ahi hiam? Amah a Bawlpa’ mai-ah sitbaang loin omzo ngei ding ahi hiam?

¹⁸Pasian in ama nasemte mahmah muangzo loin, ama sawltakte’ mawhna mu ahihleh,

¹⁹inn umna kawmin buan a kizatna inn sunga a teng mite, a inn bulpi leivui ahi,

²⁰zing kal nitak kalin, a kisusia thei sungah a omte, bangzah ta-in kuama don lohin si pakin,

²¹amau’ liatna in taisan pak ding a, pilna ngah ngei loin si pakzaw ding hi lo ahi hiam?’ hong ci hi.