Read Tedim Chin JOB 40 Bible Online

JOB 40 - Tedim Chin bible

JOB 40

¹Tua ciangin TOPA in Job kiangah,

²“Job aw, nangmah in Vanglian Pasian nong dem hi. Tu-in khawl ding na hiam, ahih kei leh keima thugen nong dawng ding hiam?” a ci hi.

³Tua ciangin Job in dawng a,

⁴“TOPA aw, ka haipau kha hi. Hong bangci dawn theih ding ka hi hiam? Tu a kipanin ka pau nawn kei ding hi.

⁵Ka gen dinga kilawm zahval genkha ka hih manin, tu a kipanin ka pau nawn het kei ding hi,” a ci hi.

⁶Tua ciangin huihpi sung panin TOPA in Job tungah thu genkik a,

⁷“Kipasalsakin dingto inla, ka thudotnate hong dawng in.

⁸Kei a thutang loin hong seh a, nang thutang kisa-in kei hong mawhsak na hi hiam?

⁹Kei zahin nang hat na hi hiam? Kei’ awging zahin nang a’ gingzo ding ahi hiam?

¹⁰Na ngap nakleh na minthanna ding le na kihihsak theih nadingin tu-in hong kipan inla, minthanna le minliatna ngah ta in.

¹¹A kiphasak mite en inla, na hehna tawh amaute niamkhiat gawp in.

¹²Mi kiphasakte en inla, amaute niamkhiat gawp in. Migilote khempeuh a omna mun munah tuancil in.

¹³Amaute khempeuh lei sungah phumcip inla, misite’ gam sungah amaute khihcip in.

¹⁴Tua bangin na hihzawh nakleh nang a hong phat masa pen pa, nang a gualzo pa na hihna thu a hong phawk masa pen pa ka hi ding hi.

¹⁵“Tui-sakol ganhing golpi ngaihsun dih in. Amah le nang a piangsak pa keimah ka hi hi. Amah in bawngtal bangin lopa bek mah ne a,

¹⁶ahi zongin ama pum sungah bangzah hatna om a, bangzahta-in a sazang khauh ahi hiam?

¹⁷Ama mei, taamtak sing bangin khauhin tal po veva a, a khe-a a sazangte hat pha mahmah hi.

¹⁸Ama guhte sumngo bangin khauh a, ama khete sikzawl bangin a khauh hi.

¹⁹“Ganhing khempeuh lak pan a lamdang pen hi a, amah a Piangsak pa bek mah in amah a zozo ahi hi.

²⁰Gamsate omna mualtung panin ama an ding lopa kipuak hi.

²¹Amah lingkung nuai-ah lum a, nawng sunga pumpeeng lakah a bu hi.

²²Lingkungte le lui gei-a gialhek kungte in ama a’ ding niliim piangsak hi.

²³Amah in gun tuikhangte kihta het lo a, tuikhang in ama maitang a nawkgawp hangin nuamtakin omthei veve hi.

²⁴Kua in ama mit tawsakin manzo ding ahi hiam? Kua in a nakpheh-ah khau vawhzo ding ahi hiam?