Read Tedim Chin JOB 41 Bible Online

JOB 41 - Tedim Chin bible

JOB 41

¹“Ngasa siahna sikkawi tawh Awle manzo ding a, khauhual khat tawh a leii henzo ding na hi hiam?

²A nakpheh-ah khau vawhzo ding a, a khaguh-ah sikkawi bulhzo ding na hiam?

³Amah in na khahna ding hong thum ding a, na hehpihna ding hong ngen ding ahi hiam?

⁴Na sila ahi tawntung dingin nangma tungah thu hong ciam ding ahi hiam?

⁵Na nasem numeite na mawlpih bangin mawlpihzo ding a, vasa khawi bangin bawlzo ding na hi hiam?

⁶Ngasa bengte in lei dingin hong deek ding a, sa zuakte in zuak dingin a sa sem ding ahi hiam?

⁷Ngasa khawhna teipi tawh a vun khawhletzo ding a, teipi lingnei tawh a lutang khawhletzo ding na hi hiam?

⁸Khatvei sukhakhin lecin na hihkik nawn kei ding a, tua na sukkhakna thu na mangngilh nawn kei ding hi.

⁹“Awle a mu mi peuhmah lau-in lei-ah a puk uh hi.

¹⁰Awle a heh ciangin kihtakhuai mahmah a, ama omna mai-ah kuamah om ngam lo hi.

¹¹Leitung a om mihingte lakah Awle a suk manin a sihlawh lo kua om ahi hiam?

¹²“Awle khete, a guh a taang, a thahatna ziate gen loin ka om thei kei hi.

¹³Kua in ama puan tungnung hawkkhiatsak zo a, a sik puanpi sunletzo ahi hiam?

¹⁴A kihtakhuai a hate a kam sungah om ahih manin, kua in ama kam phensak ngam ahi hiam?

¹⁵A nungzang sukah a lipte lum bangin kithuapsuk cinten a, suang bangin sakin kimatcip bikbek ciat hi.

¹⁶Tua lipte khatlekhat kithuapcip bikbek ahih manin, khatlekhat kikalah huih nangawn thawl zo lo hi.

¹⁷Tuate kinak mat lua ahih manin, bangmah in phelkhia zo lo hi.

¹⁸Amah a hetchiai ciangin mei-ek bangin taang zaizai a, a mittangte nisuak bangin a taang hi.

¹⁹A kam panin mei kuangkhia a, mei-ek leengkhia zaizai hi.

²⁰A nak panin meikhu suak a, selkeu khu tawh kibang hi.

²¹Ama husanna in mei tawhkuang a, ama kam panin meikuang a suakkhia hi.

²²A ngawng zong thakhauh mahmah ahih manin, a gim thei het lo thatang a nei ahi hi.

²³A vun tung khempeuh a nipna mun mahmah om lo a, sik peek bangin a sak kim hi.

²⁴A lungsim in suangtum bangin kihtak khat zong nei lo a, an gawina suang bangin sakin do lah nei lo hi.

²⁵Amah hong kithawi ciangin mi thahat pente nangawn lau a, kihta mahmah uh ahih manin cih nading thei loin a om uh hi.

²⁶Namsau tawh a kisut hangin bunzo vet lo a, teipi le thaltangte in zong bunzo tuan het lo hi.

²⁷Ama a dingin sikte, buhkung bangin nip a, sumngote nangawn sing muatsa bang lel hi.

²⁸Amah khua a phawksakzo ding, thaltang om lo a, suang tawh a kiden ciangin anvai them tu bang lel hi.

²⁹Ama a dingin molhtum pen buhkung bang hi lel a, teipi tawh a kikhawh ciangin a nuihsan lel hi.

³⁰A khecinte, beelpei kitamte tawh kibang a, lam a pai ciangin leilak kuikek gawp hi.

³¹Amah in tuipi tokin beel sunga tuiso bangsakzo a, sathau sa sunga tui tu bangin tuipi phuansak zaizai zo hi.

³²A painasa khempeuhah tuihual om dandan a, tuipi phuansak pheuphau hi.

³³Amah tehpih theih ding leitungah bangmah om lo a, bangmah kihtak a nei het lo ganhing ahi hi.

³⁴Amah in a kihtakhuai ganhing a kihisak pente nangawn nuai-et lai a, amah pen gamsa khempeuh’ kumpi ahi hi,” a ci hi.