Read Tedim Chin JOB 42 Bible Online

JOB 42 - Tedim Chin bible

JOB 42

¹Tua ciangin Job in TOPA dawng a,

²“TOPA aw, vangliatna khempeuh na neihna, na hihnop khempeuh na hih theihna thu ka thei hi.

³Kei bangmah a thei lo kimlai, ‘Bang hangin ka pilna hong dem ngam na hi hiam?’ na hong ci hi. Keimah in ka tel zawh loh thute, kei a dingin a lamdanglua thu a gengen ka hi hi.

⁴Thu na gen laitakin ka na ngaihna ding, na thugente kong dawn ding, na hong gen hi.

⁵Nidangin mi’ gensawn bekin nang ka hong thei a, tu-in keima mit mahmah tawh nang ka hong mu ta hi.

⁶Tua ahih ciangin tu-in ka paunasate khempeuh hangin ka maizum mahmah a, tu-in vutlevai khu-in nakpitakin ka kisik hi,” a ci hi.

⁷TOPA in hih thute khempeuh Job tungah a gen khit ciangin, Teman khua mi Elifaz kiangah, “Ka nasempa Job bangin, keima thu na gen ding uh a kilawm bangin gen lo na hih manun, nang le na lawm tegel tungah ka heh hi.

⁸Tu-in bawngtal sagih le tuutal sagih la-in Job kiangah paipih un la, note a dingin biakpiakna-in nei un. Job in note a dingin thu hong ngetsak ding a, keimah in ama thungetna ka pia ding hi. Note’ haina zahin kong minsiasak kei ding hi. Note in Job’ gen bangin keima thu a manin na gen kei uh hi,” a ci hi.

⁹Tua ahih ciangin TOPA’ sawl bangin Elifaz, Bildad, le Zofar gamta uh a, TOPA in Job’ thungetna a pia hi.

¹⁰Job in a lawm thumte a’ ding thu a ngetsak khit ciangin, TOPA in Job citheisakkik a, nidanga a neih ngeizah nihin neihsa lamsa a guan hi.

¹¹Tua ciangin Job’ sanggam pasalte, a sanggam numeite, le a lawm ngeite a inn-ah hong hawh uh a, a inn-ah pawi bawlin lungdamin a omkhawm uh hi. TOPA in ama tungah a tunsak gimnate hangin a khasiatpihnate uh genin a hanthawn uh hi. Amaute in sum le kham zungbuh khat ciat tawh va pha uh hi.

¹²Tua tham loin TOPA in Job’ nuntakna a masa lam sangin a nunung lamah thupha limpiak zaw hi. Job in tuu tul sawm le tulli, kalaoh tulguk, bawngtal kap tulkhat, le la a pi tulkhat a nei hi.

¹³Amah in tapa sagih le tanu thum neikik a,

¹⁴a tanu upa pen Jemimah phuak a, a nihna Keziah phuak a, a tum pen Kerenhappuk a phuak hi.

¹⁵Job’ tanute zahin a melhoih leitungah numei dang khat zong om lo a, a pa un a sanggam pasalte uh tawh a kibangin gamh a luahkhawmsak hi.

¹⁶Hih hun khit ciangin Job kum za le kum sawmli sung nungta lai a, a tute ciang bek hi loin a tu-sawnsawn ciang dong zong a mu hi.

¹⁷Tua khit ciangin a khankhinin a teeksih ta hi.