Read Tedim Chin JOB 5 Bible Online

JOB 5 - Tedim Chin bible

JOB 5

¹“Tu-in na thu ko in: Nang hong huh ding om ahi hiam? A siangthote kua pen’ lam zuan ding na hi hiam?

²Mihai pa in a hehna sihlawh a, muhdahna in sihna piangsak hi.

³Mihai pa in limtakin zung kha ngei napi, ama inn thakhatin a kizunglot ka mu ngei hi.

⁴A tapate suahtaksak zawh ding hi nawn lo hi. Kulhkongpi gei-ah amaute kisugawp a, amaute a honkhia ding kuamah om lo hi.

⁵Midangte in a neihsate liahtumsak uh a, amah sangin a hatzaw pa in a um a beel sunga a omte nangawn laksak a, a neih a lam duhgawhin a deihgawh hi.

⁶Leilak panin gimna hong piangtawm lo a, lei sung panin lungkhamna hong pokhiatawm lo hi.

⁷Mei-ek a to leen mah bangin mihingte in amau’ lungkhamna ding mah a piangsak uh hi.

⁸“Nang hi leng, ka Pasian’ tungah ka thum ding a, ama tungah ka thu ka ap ding hi.

⁹Amah in na liante le kuama phawk zawh loh thute sem a, genzawh lohin a lamdang na tampi a bawl hi.

¹⁰Amah in guah zusak a, lo khempeuh tui a buak hi.

¹¹Amah in mi niamte sangkoih a, a dahte lungnuamsak hi.

¹²Amah in migilote’ geelna suksiatsak ahih manin amaute in a ngimna uh tangtun thei lo uh hi.

¹³Amah in migilote amau’ gitlohna mahah awksak a, ngian a zangte’ geelna zong a lumletsak hi.

¹⁴Sunthapai-in khuamial sung kidenna a, suntangpi mahin zan bangin mial a zawt uh hi.

¹⁵Ahi zongin amah in amau’ kiang panin pa nei lote honkhia a, mi thahatte kiang panin mi cimawhte a honkhia hi.

¹⁶Tua ahih manin mizawngte in lametna neikik uh a, thuman lo mite ahihleh kihencip hi.

¹⁷“Pasian in a taii mite mi nuamsa hizaw ahih manin, Vanglianpa’ taiina thupi san in.

¹⁸Bang hang hiam cih leh amah in a liamsak hangin a liamna tunsak ding a, ama satna liamma damsak ding hi.

¹⁹Lungkhamna gukvei dong na tuahna-ah amah in nang hong hon ding a, a sagihveina dingah siatna in nang hong su nawn lo ding hi.

²⁰Kialpi sungin sih nading pan nang hong honkhia ding a, gal sungah namsau panin nang hong suaktasak ding hi.

²¹Gensiatna panin nang hong kihu ding a, siatna hong tun ciangin na lau kei ding hi.

²²Suksiat ding le puksih dingte na nuihsan lel ding a, leitung gamsate na kihta kei ding hi.

²³Bang hang hiam cih leh na lo sungah suang om lo ding a, gamlak gamsate in hong su lo ding hi.

²⁴Na inn sungah lunghihmawhna ding om lo hi, ci-in na thei ding a, na inn kiim na et ciangin a kitasam bangmah om lo ding hi.

²⁵Na suan na khakte tampi tak pha ding hi, ci-in na thei ding a, na sunga piangte leitung lopa zah pha ding hi, ci-in na thei ding hi.

²⁶A hun ciangin ancilna phualah buhlom a tun mah bangin a teek sihin han na zuan ding hi.

²⁷Hih thute khempeuh ka kantel uh a, a thuman a na hi hi. Hih thute ka zaksa uh hi a, a manna na thei ding hi,” a ci hi.