Read Tedim Chin JOB 6 Bible Online

JOB 6 - Tedim Chin bible

JOB 6

¹Tua ciangin Job in dawng a,

²“Ka lunggimna kitawikhai hen la, ka haksatna khempeuh kitawiteh leh!

³Tuipi sehnel khempeuh sangin gikzaw ding ahih manin ka kampaute guhin a kha hi.

⁴Vanglianpa’ thaltangte in kei hong kha a, ka sungah a thal gu kidiah hi. Pasian in a kihtakhuai-in kei hong su hi.

⁵Gam late in lopa a nek laitakin ham a, bawngtal in an a nek laitakin ham ahi hiam?

⁶An lim lote, ci sawh loin kine thei a, aktui da kang in limna nei ahi hiam?

⁷Ka kam in tuate ciam nuam lo a, tuate khempeuh a luaksuahhuai an tawh a kibang lel ahi hi.

⁸“Ka ngetna ngah thei hi leng a, Pasian in ka deihna hong pia ding hileh

⁹Pasian in kei hong sucip hen la, a khut zanin kei hong that vet leh!

¹⁰Tua hileh keima kihehnepna hi ding a, hih zahta ka thuakna-ah nuamin ka diang ding hi. Bang hang hiam cih leh Siangtho Pa’ thu ka nial khat zong om lo hi.

¹¹Ka thuak lai nadingin bang hatna nei nawn a, lungduai a ka om nadingin lamet ding bang om nawn ahi hiam?

¹²Ka thahatna suang bang hi a, ka pumpi in sumngo tha paii ahi hiam?

¹³Kei le kei’ sung panin huhna bangci ngahtawm theih ding ka hi hiam? Kei hong kihuhna ding ka ngetna ding kuamah om lo hi.

¹⁴“Pasian ka nusia a, ka nusia kei zongin, hih bang lungkham hunin lawm citak ka kisam hi.

¹⁵No ka lawmte pen, lui tuikhang bang, a mangthang pak tui let bang,

¹⁶nin a khalhnelh vuk le tuikhal bangin na zuautat uh hi.

¹⁷Khua a lum ciangin tuate tui mangthang a, ni a sat ciangin a kang hi.

¹⁸Tua tui a zong dingin khualzin mite pai kawikawi a, gam sung tengah kawi pai-in a mangthang uh hi.

¹⁹Tema khuami khualzinte in zong tua tui zong uh a, Sheba mite in zong tua tui muanin a nei uh hi.

²⁰Ahi zongin tua a lametna uhah cimawh uh hi. Tua tui zuan uh a, a om loh ciangin cih nading thei loin kamka lel uh hi.

²¹Tu-in zong kei a dingin note tua bang lel na hi uh hi. Ka gimna teng nong mu uh a, na lau uh hi.

²²No kiangah, ‘Na khat peuhpeuh hong pia un, ka suahtak nadingin sum tawh hong huh un,

²³ka galte’ kiang panin hong honkhia un, kei a hong nengniamte’ khutsung panin hong tankhia un,’ hong ci ngei zenzen ka hi hiam?

²⁴“Hong hilh thei le-uhcin, pau loin ka ompah ding hi. Ka khialhna hong theitelsak dih un.

²⁵Lungsim takpi tawh thugennate heh loin kisang thei a, ahi zongin no hong taiina in bang phatuamsak ahi hiam?

²⁶Kamging mawkmawk lelte heh taak sa a, huih’ letmang cihmawh kamte thupi ngaihsut na hi uh hiam?

²⁷Mi cimawh khat suksiatgawp sawm a, na lawm khat uh hihgawp sawm na hi uh hiam?

²⁸Tu-in kong thum hi; kihei unla kei hong en un. Na maitang uhah zuau a gen dingin kilawm ka hi hiam?

²⁹Ngaihsun pha un, a kilawm lopi-in kei hong hih kei un. Ngaihsun pha un, ka hoihna teng a hong kize-et hi lel hi.

³⁰Ahi zongin zuau gen mahin nong ngaihsun lai veve uh a, a sia le a pha a khenthei loin nong seh lai veve uh hi.