Read Tedim Chin JOB 7 Bible Online

JOB 7 - Tedim Chin bible

JOB 7

¹“Leitungah mihing in nasep haksa nei a, ama hun pen nasempa-a’ bang hi lo ahi hiam?

²Sila nasemte in niliim lunggulhin nasempa in a thaman a ngak tawh kibang hi lo ahi hiam?

³A mawkna-in kha tampi sung ka om a, zanthapai-in lungkhamna bek keima tanh ahi hi.

⁴Nitak ka lup ciangin, ‘Cik ciangin khua hong vakin zing ka tho tam,’ ka ci hi. Ahi zongin zan sau a, zingsang khuavak mateng ka kigawigawi hi.

⁵Ka pumpi tung khempeuhah than bekbek kidim a, ka vun tung khempeuh meima in tuamcip hi.

⁶Ka hunte siamgante’ siam ciangtang sangin manlang zaw a, lametna om loin a mong tung pak hi.

⁷“Pasian aw, ka nuntakna husan’ bang bek ahihna hong phawk in. Ka mit in hun nuam mukik ngei nawn lo ding hi.

⁸Kei hong mu ngei pa in kei hong mukik nawn lo ding a, na hong et laitak mahin ka mangthang ding hi.

⁹Meiilum kaite bei-in a manthan bangin Leinuai a paisuk pa mangthang ding hi.

¹⁰Ama inn ah hong ciahkik nawn lo ding a, ama omna ngei mun in amah thei nawn lo ding hi.

¹¹Tua ahih manin pau loin ka om kei ding hi. Ka lungkham manin kam ka pau ding a, ka gimluat manin ka phun ding hi.

¹²“Kei a hong cing ding na koih nadingin kei, tuipi ganhing hong sa na hi hiam?

¹³Lum leng nuam ding a, ihmu leng phatuam ding hi, ci leng lah,

¹⁴a lauhuai mang nong mansak a, a lauhuai maangmuhna tawh nong lausak hi.

¹⁵Tua ahih manin gui-awk ding ka utzaw a, hih bang ka thuak sangin ka si nuamzaw hi.

¹⁶Ka lungkham a, ka nungta nuam nawn kei hi. Ka nuntakna pen husan’ bang hi lel ahih manin hong hici omsak hoh in.

¹⁷“Nang in hih zahin na thupi ngaihsut dingin na lungsimah na ngaihsut dingin

¹⁸zingsang simin gim a pia dingin ama kiangah pai-in amah na ze-et themthum nadingin mihing bang hi lel ahi hiam?

¹⁹Tomkha sung beek hong pelh lo ding a, ka hu beek hong sangsak man lo ding na hi hiam?

²⁰Mihingte a encik pa aw, a khial ka hih leh zong nangma tungah bang gamta khial ka hi hiam? Bang hangin kei hong ngim a, bang hangin nangma muitum suak zenzen ka hi hiam?

²¹Bang hangin ka khialhna hong maisak lo a, ka mawhna hong maisak lo na hi hiam? Tu-in han sungah ka lum ding a, nong zonzon hangin ka na om nawn kei ding hi,” a ci hi.