Read Tedim Chin JOB 8 Bible Online

JOB 8 - Tedim Chin bible

JOB 8

¹Tua ciangin Shuah gammi Bildad in dawng a,

²“Tua bang thu bang tanvei gengen ding a, bang tanvei paupau ding na hi hiam?

³Pasian in thutang a zanglo sa na hi hiam? Vanglianpa in thuman a zanglo sa na hi hiam?

⁴Na tate ama tungah khial a, amau’ mawhnate amaute a tuaksak ahi hi.

⁵A hun lai-in Pasian zong inla, Vanglianpa’ hehpihna ding thuum lecin,

⁶nang dikin thutang kisa mahmah na hih leh pel loin amah in nang hong en ding a, na thumanna tawh kizui-in thaman hong pia ding hi.

⁷Tua hileh, na zawn’ mahmah khit hangin a tawpna-ah na hau kik ding hi.

⁸“Khangluite’ thu kantel inla, pute pate’ tuahsa thute ngaihsun pha in.

⁹Eite pen zan mah mi ihi a, bangmah i thei kei hi. Leitung a i nuntakna pen niliim bang lel ahi hi.

¹⁰Amaute in nang hong hilhin, a thu hong genin, amau’ phawksa thute hong gen ding hi lo ahi hiam?

¹¹“Ciknawng om lohna-ah laiphai kung po thei ahi hiam? Tui om lohna-ah pumpeeng pung thei ahi hiam?

¹²Ahi zongin tuate a pak kimlai a phuk hun nai lopi-in kungno dang khempeuh sangin keu masa zaw hi.

¹³Pasian a mangngilhte tua bangmah ahi hi. Pasian a don lo mite’ lametna a bei ta ahi hi.

¹⁴Ama kimuanna maimom khau bang hi lel a, ama ki-upna maimom bu bang hi lel hi.

¹⁵A inn tungah kingam a, a inn hoi hi. A inn lencip a, ahi zongin kip zo lo hi.

¹⁶“Amah pen nitaang sungah hoihtakin a khang kungno, a huan sungah a dawn hilhhelh kungno ahi hi.

¹⁷Ahi zongin suangtum lakah a zung a kivialgawp, suangtawphah a phukha zung a suak hi.

¹⁸Tua ciangin mi khatpeuh in a phung pan zungbawh a, ‘Cik mahin nang hong thei ngei peuhmah kei ing,’ ci-in a lawnkhia hi.

¹⁹Hih bang danin ama nuntakna bei a, lei sung panin kung dangte hong pokhia hi.

²⁰“Theitel in; Pasian in cikmah hunin mawhbaang lo mite nilkhia lo ding a, gamtatsia mite huh ngei lo ding hi.

²¹Na mukah lungdam nuihna hong omsak ding a, na kam sungah lungdam a kikona hong omsak ding hi.

²²Nang hong mudahte in maizumna ngah ding uh a, migilote’ puanbuk maimang ding hi,” a ci hi.