Read Tedim Chin JOB 9 Bible Online

JOB 9 - Tedim Chin bible

JOB 9

¹Tua ciangin Job in Pasian dawng a,

²“Kuamah in Pasian a zawhzawh lohna a teltakin ka theita hi.

³Mi khatpeuh Pasian tawh thu a kinial ding hileh tulkhat sungah khatvei nangawn dawng thei lo ding hi.

⁴Amah pil mahmah a, vanglian mahmah hi. Kua in khauhtakin nial a, nial paisuakzo ahi hiam?

⁵Pasian in mualte lingsak a, tawlngasak lo hi. Ama hehna tawh mualte a lumlet hi.

⁶Amah in leitung lokgawp a, a khuampite kiling hi.

⁷Amah in ni a suak lo dingin thu pia a, aksite sincip hi.

⁸Amah bek in vanpi zal a, tuipi tuihualte tuancil hi.

⁹Amah pen vana a om Khawlei-uikai, Zawlzawng, Seguk, le Khanglam aksite a bawlpa ahi hi.

¹⁰Amah in kuama theih zawh loh na lian tampi bawl a, kuama simzawh loh nalamdang tampi sem hi.

¹¹“Ka kiangah amah hong pai a, ke’n amah ka mu thei kei hi. Amah gam tangtang napi-in, amah ka theithei kei hi.

¹²Amah in lakhia nuam leh a khaktanzo ding kua om ahi hiam? Bang hih na hi hiam, kua’n ci thei ding ahi hiam?

¹³Pasian in ama hehna dokkik het lo mah ding hi. Rahab’ pawlte nangawn a khenuai-ah kun uh hi.

¹⁴Tua ahih ciangin keimah in bangci dawn theih ding a, amah ka nialna ding kammal bangci muh ding ka hi hiam?

¹⁵Kei ka dik hangin amah ka dawng thei kei hi. Kei hong mawhsak pa tungah hong hehpih ding ka nget kul hi.

¹⁶Thukhen zumah amah samin hong pai hita mah leh zong ka thumna hong ngai dingin ka um tuan kei hi.

¹⁷Bang hang hiam cih leh thu themno khat hangin nakpitakin kei hong hih a, thu om lopi-in gimna tampi hong thuaksak hi.

¹⁸Ka hu nangawn hong sangsak man lo a, lungkhamna tawh kei hong kidimsak hi.

¹⁹Thatanghat thu ding hileh, amah hat mahmah a, thutang kituh hi leng, kua in thukhen zumah amah samzo ding ahi hiam?

²⁰Kei ka dik hangin keima kam mah siksanin kei hong man ding a, mawhbaang lo ka hih hangin keima kampau hong lehheisak ding hi.

²¹Paubaanna ka neih loh hangin kei a thupi-in ka kingaihsun tuan het kei a, ka nuntakna ka kih hi.

²²Thu khat bek om hi. Tua ahih ciangin amah in a paubaang lote le a gilote susia khawm hi, ka ci hi.

²³Lauhuai lianpi hong tung pakin sihna a om ciangin mawhbaang lote’ thumna a nuihsan lel hi.

²⁴Migilote’ khut sungah leitung kipia a, amah in thukhen mangte’ mit a tuncipsak hi - amah hikeileh kua hi ding ahi hiam?

²⁵“Laitaite sangin ka hun nawhtai zaw a, beipak ahih manin nopna ngah kha lo hi.

²⁶Pumpeeng gunkuang bangin ka hun nawhpai a, muvanlai sa bawh bangin a nawhlen’ hi.

²⁷Ka dahnate kimangngilh bawlin kimaitaisak ding ci taleng zong,

²⁸a dikin nong seh loh ding lamtak thei khin ka hih manin ka thuak ding thute hangin kei ka lau mahmah hi.

²⁹Kei a mawhin hong kiseh veve ding ahihleh bang hangin a mawkna-in na sem ding ka hi hiam?

³⁰Satpiang tawh kei kisilin, vuttui tawh ka khut sawp taleng,

³¹buannawng sungah kei nong hencip veve ding a, ka puan ninte in a kihhuai hong suaksak ding hi.

³²Amah ka dawn theih nadingin amah, kei bangin mi hi lo a, thukhen zumah thu kineihpih theih hi lo hi.

³³Ko tegel kikalah thu hong khen ding khat om thei hen la, ko tegel tungah aana hong zang ding khat om thei hileh,

³⁴kei hong kisatna ciang hong paih khiatsak ding a, kei tungah lauhuaina lianpite hong om nawn lo ding hi.

³⁵Bangbang ahi zongin amah kihta hetloin ka pau ding hi; bang hang hiam cih leh kei’ omzia ding bangin kei ka om loh lamtak teltakin ka kithei hi.