Read Tedim Chin Late 102 Bible Online

Late 102 - Tedim Chin bible

Late 102

¹TOPA aw, ka thungetna hong za inla, ka thumna hong ngai in.

²Ka cihmawh hunin kei kiang panin bu kei in. Keima lam hong nga inla, kong sap ciangin hong dawng pah in.

³Bang hang hiam cih leh ka nuntakna, meikhu bangin beimang a, ka pumpi meikuang bangin a sa hi.

⁴Lungkham luatna hangin lopa bangin ka keutum a, an nangawn ka nezo kei hi.

⁵A gingin ka tautauna hangin ka guh guakin ka om hi.

⁶Gamlak a om musane le mun kolhna-ah a om simbu tawh ka kibang hi.

⁷Ihmu thei loin ka om a, innkhum dawna vasa khat guak a om tawh ka kibang hi.

⁸Sun nilohin ka galte in kei hong zahko uh a, kei hong simmawhte in samsiatna-in ka min a zang uh hi.

⁹Bang hang hiam cih leh vut bek ka annek hita a, na thangpaihna le na hehna hangin ka tuidawnte khitui tawh kihel hi. Bang hang hiam cih leh nang in kei hong domto napi-in lei nong denna hi.

¹¹Keima nuntakna pen nitak lama a om niliim tawh kibang lel a, lopa bangin ka vulgawp hi.

¹²Ahih hangin TOPA aw, nang na kip ngitnget a, khang tawntungin nang hong kiphawkna kip hi.

¹³Nangmah tho-in Zion khua na hehpih ding hi. Amah na angvan hun ding hita a, a kiciangtansa hun hong tung khin hi.

¹⁴Bang hang hiam cih leh na nasemte in tua khua suangtumte it uh a, a leivuite nangawn pammaih sa uh hi.

¹⁵Minamte in TOPA hong zahtakin, leitung kumpi khempeuh in na minthanna hong zahtak ding uh hi.

¹⁶Bang hang hiam cih leh TOPA in Zion khua lam ding a, ama minthanna hong kilang ding hi.

¹⁷Amah in mi cimawhte’ thungetna kinin, amau’ thumna simmawh lo ding hi.

¹⁸A suak nai lo mite in TOPA a phat theih nadingin a hong tung lai ding khang mite a dingin hih thu kiciamteh hen:

¹⁹Mihingte, kumpi gamte, TOPA a bia dingin a kikaihkhop uh ciangin, mite in Zion khua sungah TOPA’ min, Jerusalem khua sungah amah phatna a pulak theih nadingun, thongkiate’ taunate a za ding le a si dingin a kisehte a khahkhia dingin a sangna ama siangtho mun panin amah in hong ensukin, vantung panin TOPA in leitung hong en hi.

²³Amah in kei a khangtung kimlai ka thahatna hong suktat sakin, ka hunte hong khiapsak hi.

²⁴Keimah in, “Khang tawntungin a kip ka Pasian aw, hong khansihsak kei in,” ka ci hi.

²⁵Tanglai hunin nangmah in leitung bulpi na koih a, vantungte zong nangma khut tawh na bawlsa ahi hi.

²⁶Amaute sia ding uh a, ahih hangin nang na kip ding hi. Puan bangin amaute paatkhia ding uh hi. Nangmah in amaute puan bangin na khek a, amaute a maimang uh hi.

²⁷Ahi zongin nang na kibang ngitnget a, na nuntak hun in mong nei lo hi.

²⁸Na nasemte’ tate lungmuangin om ding uh a, amau’ suanlekhakte na mai-ah kip ding uh hi.