Read Tedim Chin Late 103 Bible Online

Late 103 - Tedim Chin bible

Late 103

¹TOPA ka phat ding a, ka lungsim khempeuh tawh ama min siangtho ka phat ding hi.

²TOPA ka phat ding a, ama migitna ka mangngilh kei ding hi.

³Amah in ka mawhna khempeuh hong maisak a, ka natna khempeuh hong damsak hi.

⁴Hankhuk tung ding kimlai hong suaktasak a, itna le hehpihna tampi hong pia hi.

⁵Muvanlai bangin ka tha a hat theih nadingin thupha namkim hong pia hi.

⁶TOPA in a kinengniamte a dingin thuman thutangin thu a khen hi.

⁷Amah in ama geelna Moses tungah gen a, ama nasepnate Israel mite a musak hi.

⁸TOPA dikin hehpihna tawh kidim a, heh hakin, a lian mahmah itna kip tawh a kidim hi.

⁹Amah in a tawntungin hong taii ngitnget lo ding a, amah heh paisuak lo ding hi.

¹⁰Amah in eite’ khialhna tawh a kituakin eite tungah hong bawl lo a, eite’ mawhna tawh a kituakin hong thukkik lo hi.

¹¹Vantung pen leitung panin a san mah bangin amah a zahtakte’ tungah ama itna kip lianin sang mahmah hi.

¹²Nisuahna pen nitumna panin a gamlat mah bangin i mawhna hangin gimnate eite’ kiang panin gamlapi-ah a nilkhia hi.

¹³Pa in tate a hehpih bangin TOPA in amah a zahtakte hong hehpih hi.

¹⁴Bang hang hiam cih leh amah in eite’ pianna hong thei a, eite pen leivui ihihna a phawk hi.

¹⁵Eite ihih leh i nuntakna pen lopa tawh kibang a, lolai-ah a po paakte bangin a palh hi.

¹⁶Bang hang hiam cih leh huih in amah semin beimang a, tua mun in amah thei nawn lo hi.

¹⁷Ahih hangin TOPA’ itna kip pen amah a zahtak mite tungah a tawntung pan a tawntung dongin kip ngitnget a, ama thumanna pen ama thuciamna zui-in a thupiak bangin sep ding a phawk mite tungah a khang khangin a kip tawntung hi.

¹⁹TOPA in vantungah ama tokhom phutkhin a, amah in mun khempeuh a uk hi.

²⁰Ama thugen a ngai, ama thu bangin a sem no a thahat, no ama vantung mite aw, TOPA phat un.

²¹Ama deih bangin a gamta ama nasem, ama mihon khempeuhte aw, TOPA phat un.

²²Ama ukna sunga a om ama bawlsate aw, TOPA phat un. Ke’n, TOPA ka phat ding hi.