Read Tedim Chin Late 104 Bible Online

Late 104 - Tedim Chin bible

Late 104

¹TOPA ka phat ding hi. TOPA ka Pasian aw, nang na lian mahmah hi. Minthanna le liatna nang na silh hi.

²Puanza tawh tuam bangin khuavak tawh na kituam a, vantungte pen puanbuk bangin na zal hi.

³Vana om tui tungah na inn na lam a, na leeng dingin meiipite na bawl a, huih khate tungah nang na tuang hi.

⁴Na kamtai dingin huihte na bawl a, mei le meikuangte na nasemte na hisak hi.

⁵Leitung a ling ngei lo dingin ama bulpi tungah na phut hi.

⁶Nangmah in puan tawh tuam bangin leitung pen tui thukpi tawh na tuam a, tuate in mualte tuumcip hi.

⁷Na thuhilhna hangin tua tuite taikhia uh a, na thupiakna awging a zak uh ciangin kikhawhkhia uh hi.

⁸Mualtung le guam sungah tua tuite luang uh a, amau a dingin na sehsa munah a tung uh hi.

⁹Tua tuite in leitung a tuamkik loh nadingin amaute’ kantan loh ding gamgi khat na phut hi.

¹⁰Kuamte sung panin ciktui na phulkhiasak a, mualte kikalah a luang uh hi.

¹¹Gamlak ganhingte’ dawn ding tui na pia a, gamlak sakolte in a dangtakna uh tua tui-ah a phasak uh hi.

¹²Tua tui kiangah huihlak vasate om uh a, singhiangte lakah amaute ham zaizai uh hi.

¹³A sangna mun na omna panin mite tungah guah na zusak a, nangma thupha tawh leitung a kidim hi.

¹⁴Nangmah in ganhingte a dingin lopa, mihing in leilak panin an a ngah theih nadingin a khawh ding ankungte,

¹⁵mihing lungsim a nuamsak ding leenggahzu, mihing maitang a zolsak ding sathau, mihing lungsim a hatsak ding an na piangsak hi.

¹⁶TOPA in a suan, Lebanon muala om taamtak singte, tua ama singkungte in guahtui tampi a ngah hi.

¹⁷Tua singte tungah vasate in bu bawl uh a, taksing kungte lakah gun vapite in bu a tom uh hi.

¹⁸Mual sangte pen sathakte a’ ding hi a, suangtumte pen sakhite’ belh ding ahi hi.

¹⁹Hun ciamteh nadingin khapi na bawl a, ni in zong a tum ding hun a thei hi.

²⁰Nangmah in khuamial na bawl a, gamlak ganhing khempeuh a vakkhiat hun pen zan hunsung ahi hi.

²¹Humpinelkai khanglaite in amau’ nek ding sa a ngah nadingun nakpitakin hawk uh a, amau’ an ding Pasian’ tung pan a ngah uh hi.

²²Ni a suah ciangin amaute kihemkhia uh a, a kua sung uhah a lum hithiat uh hi.

²³Mite pen nasem dingin kuankhia uh a, nitak mateng na sem uh hi.

²⁴TOPA aw, na sepsa nate tam mahmah hi. Nangmah in ciimna tawh tuate khempeuh na bawl a, na piansak ganhingte tawh leitung a kidim hi.

²⁵Hua lai-ah, ganhing a lian a neu, simzawh lohin a tam, a vak muamua-na, lianin a zai mahmah tuipi om hi.

²⁶Hua tuipi tungah teembawte le gualnop nadingin na bawl Awle a pai hi.

²⁷A hun ciangin an na piak ding ngakin hihte khempeuh in nangmah hong en uh hi.

²⁸Na piak ciangin amaute in ne uh a, an na pia a, amaute lungkim uh hi.

²⁹Na maitang na seel ciangin amaute khasia uh hi. Amau’ husanna na lakkhiat ciangin amaute si-in amau’ pianna leivui-ah a ciahkik uh hi.

³⁰Na hu na sankhiat ciangin amaute a kipiangsak hi a, nangmah in leitung na bawlthak hi.

³¹Leitung a et ciangin tua leitung kilingin, mualte a lawn’ ciangin tua mualte meikhu a suak, ama nasepna-ah TOPA lungdam hen la, TOPA’ minthanna kip tawntung tahen.

³³Ka nuntak laiteng TOPA tungah la ka sa ding a, ka hin laiteng ka Pasian phatna la ka sasa ding hi.

³⁴TOPA in hong lungdamsak ahih manin ka lasaknate in zong amah lungdamsak tahen.

³⁵Leitung panin mawhnei mite beimang hen la, migilote om nawn kei hen. Ke’n, TOPA ka phat ding hi. TOPA ka phat ding hi.