Read Tedim Chin Late 105 Bible Online

Late 105 - Tedim Chin bible

Late 105

¹TOPA tungah lungdamna ko-in, ama min phat unla, ama sepnate khempeuh mite lakah kitheisak un.

²Ama tungah la sa un. Ama tungah phatna la sa unla, a lamdang a septe khempeuh gen ciat ta un.

³Ama min siangtho hangin lungdam unla, TOPA a zong mite lungdam tahen.

⁴TOPA le ama huh ding zon belin nei unla, a tawntungin ama maipha zong niloh un.

⁵No ama nasem, Abraham’ suanlekhak, Jakob’ tate, ama teel mite aw, ama sepsa a lamdang nate, ama nalamdang lahte, a genkhiat a thukhennate phawk ciat ta un!

⁷Amah pen TOPA, eite’ Pasian hi a, ama thupiaknate leitung khempeuh in a zuih ding ahi hi.

⁸“Na luah dingin Kanaan gam ka hong pia ding hi,” ci-in Abraham tawh thuciam a bawlsa, Isaac tungah a thuciamsa, Jakob tungah thupiakna a kipsak, Israel tungah tawntung thuciamna, ama thupiaksa kammal, ama thuciamna pen khang tulkhat dongin amah in phawk ngitnget hi.

¹²Amaute tawm mahmahin, bangmah gentham lo uh a, khualmi hi-in,

¹³minam khat panin minam dang khatah, gam khat pan gam khatah a vak kawikawi laitakun,

¹⁴amah in amaute kuamah nengniamsak lo hi. Amaute’ hangin amah in kumpite thuhilhin,

¹⁵“Ka sathau nilhte sukha kei un; ka kamsangte tungah siatna bawl kei un,” ci hi.

¹⁶Amah in leitungah kialpi tungsakin, nektheih an khempeuh a siatsak ciangin,

¹⁷amah in, Josef a kici, sila-a a kizuak mi khat, amaute’ mai-ah a sawl hi.

¹⁸Ama khete pen kolte in nasak a, ama ngawng pen sikkol sungah kikoih hi.

¹⁹Ama thugente a tun matengin TOPA in amah ze-et hi.

²⁰Amah a khahkhia dingin kumpipa in mi paisak a, mihingte a ukpa in amah a khahkhia hi.

²¹Josef in kumpipa’ uliante ama ut bangin lamlakin, a upate pen pilna hilhsak a, ama innsung topa ama neihsa khempeuh a ukpa-in a koih hi.

²³Tua ciangin Egypt gamah Israel va pai a, Ham’ gam sungah peemta-in Jakob va om hi.

²⁴TOPA in ama mite pungsak mahmah a, a galte sangin amaute hatzaw sak hi.

²⁵Ama mite mudahin, ama nasemte siamna tawh a khem dingin amaute’ lungsim amah in kiheisak hi.

²⁶Amah in, ama nasem Moses le ama teelsa Aaron a sawl hi.

²⁷Amaute in ama limte amaute’ lakah na lamdangte Ham’ gam sungah a bawl uh hi.

²⁸Amah in khuamial sawl a, leitung khim a zingsak hi. Ahih hangin Egypt mite in ama thu a langpang uh hi.

²⁹Amah in amau’ tuite sisan suaksak a, a ngasate uh a sisak hi.

³⁰Amau’ leitang tung le a kumpipa’ innsung nangawn uiphukte tawh a kidim hi.

³¹Amah kampau a, thohonpi le thokangte gam sung dimin hong om hi.

³²Amah in a guah dingun gialpi, amau’ gam sung khempeuh a taangsak khuaphialep, amaute a pia hi.

³³Amah in amau’ leengguite le a theikungte uh vattansak a, amau’ gam sung sing khempeuh a kuaihtansak hi.

³⁴Amah kampau a, kauphete le tangngolte, simzawh lohin hong pai uh a,

³⁵gam sunga kung khempeuh, amau’ leitang panin a gah khempeuh a nektumsak mang hi.

³⁶Amau’ sung pan a piang masa Egypt tacil khempeuh a satlum hi.

³⁷Tua ciangin amah in ngun le kham tawh Israel-te paikhiatpih a, amaute a vekpi-in cidamin thahat kim uh hi.

³⁸Amaute a paikhiat ciangun Egypt mite lungdam mahmah uh hi. Bang hang hiam cih leh amaute kihta uh hi.

³⁹Amaute a liah dingin amah in meiipi kaisak a, zanin khua muh nadingin mei a omsak hi.

⁴⁰Amaute in ngen a, vantung panin anlum tampi a pia hi.

⁴¹Amah in suangpi hong a, tui a phulkhia hi. Guntui bangin sehnel gamah tui a luang hi.

⁴²Bang hang hiam cih leh a siangtho ama thuciamna le ama nasem Abraham a phawk hi.

⁴³Tua ahih ciangin ama mite lungdamna tawh, ama teel mite lasakna tawh a paikhiatpih hi.

⁴⁴Amaute in ama ngeina kipte zui-in, ama thukhamte a neih theih nadingun, amah in amaute tungah minam dangte’ leitang pia a, midangte’ nasepna gahte zong amaute a ngahsak hi. TOPA phat un.