Read Tedim Chin Late 118 Bible Online

Late 118 - Tedim Chin bible

Late 118

¹TOPA’ tungah lungdamna ko un. Bang hang hiam cih leh amah hoih a, ama itna kip tawntung hi.

²“Ama itna kip tawntung hi,” Israel-te in ci ta uh hen.

³“Ama itna kip tawntung hi,” Aaron innkuante in ci ta uh hen.

⁴“Ama itna kip tawntung hi,” amah a zahtakte in ci ta uh hen.

⁵Ka cihmawhna-ah TOPA ka sam a, TOPA in hong dawngin mun tanzau-ah hong koih hi.

⁶TOPA in kei hong ompih hi. Bangmah ka kihta kei ding hi. Mihingte in kei, bang hong cihzo ding ahi uh hiam?

⁷Kei hong huh dingin kei lamah TOPA om hi. Kei hong mudahte pen gualzawhna tawh ka en ding hi.

⁸Mi i muan sangin TOPA belh ding hoihzaw hi.

⁹Uliante i muan sangin TOPA belh ding hoihzaw hi.

¹⁰Minam khempeuh in kei hong umcih uh hi. Ahih hangin TOPA’ vang tawh amaute ka sugawp hi.

¹¹Amaute in ka kimkotah kei hong umcih uh hi. Ahih hangin TOPA’ vang tawh amaute ka sugawp hi.

¹²Amaute in khuaipi bangin kei hong umcih uh a, ahi zongin selkeu kuang bangin amaute daikik pak uh hi. TOPA’ vang tawh amaute ka sugawp hi.

¹³Kei ka puk nadingin nakpitakin hong kisawn a, ahih hangin TOPA in kei hong huh hi.

¹⁴TOPA in a vanglian, a thahatin kei hong bawl a, amah pen kei a hong honpa ahi hi.

¹⁵Ngai un! Thuman mite’ puanbuk sungah gualzawh lungdamna la kisa a, “TOPA’ taklam khut in a lian nate hih khin hi.

¹⁶TOPA’ taklam khut kipahtawi a, TOPA’ taklam khut in a lian nate hih khin hi,” kici hi.

¹⁷Kei ka si kei ding a, ka hing ding hi. TOPA’ sepnate ka gengen ding hi.

¹⁸TOPA in nasia takin kei hong thuhilh a, ahih hangin kei hong sisak lo hi.

¹⁹TOPA’ tungah lungdamna ko-in ka lut theih nadingin biakinn kongpite kei hong hon in.

²⁰Hih pen TOPA’ kongpi ahi hi. Thuman mi bek hih kongpi-ah lut ding hi.

²¹Nangmah in kei hong dawngin, hong honkhia na hih manin nangma tungah ka lungdam hi.

²²Innlamte in a nilkhiat suang pen innkiu suang bulpi suak khinta hi.

²³Hih pen TOPA’ nasepna hi a, eite’ mitah lamdang hi.

²⁴Hih ni pen TOPA’ hong piak ni hi a, eite lungdamin i kipak ding hi.

²⁵TOPA aw, kote hong hon in; hong thum ung. TOPA aw, kong thum uh hi; kote hong daupaisak in.

²⁶TOPA’ min tawh hong pai pa in thupha ngah tahen. TOPA’ inn panin nang kong phat uh hi.

²⁷TOPA pen Pasian ahi hi. Amah in eite tungah nopsakna hong piazo hi. Na khut uhah singhiang tawi-in, biakna tau kimkotin pai un.

²⁸Nang pen keima Pasian na hi a, nangma tungah lungdamna kong ko ding hi. Nang pen keima Pasian na hi a, nangmah kong phat ding hi.

²⁹TOPA tungah lungdamna ko un; bang hang hiam cih leh amah hoih a, ama itna kip tawntung hi.