Read Tedim Chin Late 13 Bible Online

Late 13 - Tedim Chin bible

Late 13

¹TOPA aw, bang tanvei hi lai ding ahi hiam? Kei hong mangngilh paisuak ding na hi hiam? Bang tanvei kei kiang pan na maitang seel ding na hi hiam?

²Bang tanvei gimna thuakin, sunthapai-in ka lungsim dah ding ahi hiam? Bang tanvei kei tungah ka galte gualzo ding ahi hiam?

³TOPA ka Pasian aw, ngaihsun inla hong dawng in. Ihmulum kha ding ka hih manin ka mitte hong vaksak in.

⁴Ka galte in, “Ama tungah gualzo khin ung,” ci kha ding hi. Kei ka lin’ manin ka galte nuam kha ding hi.

⁵Ahih hangin na itna kip ka muang a, nong hotkhiatna hangin ka lungdam ding hi.

⁶Nong hehpihna kicing ahih manin, TOPA, la kong sak ding hi.