Read Tedim Chin Late 135 Bible Online

Late 135 - Tedim Chin bible

Late 135

¹TOPA phat un. I Pasian’ inn huangsung, TOPA’ innsunga a ding, TOPA’ nasemte aw, TOPA phat un; ama min phat un.

³TOPA phat un; bang hang hiam cih leh TOPA hoih hi. Ama min phatna la sak un; bang hang hiam cih leh amah phatnophuai hi.

⁴Bang hang hiam cih leh TOPA in ama a dingin Jakob teel a, ama neihsa dingin Israel teel khinta hi.

⁵Bang hang hiam cih leh TOPA lian hi, ci-in ka thei a, eite’ TOPA pen pasian dang khempeuh sangin a lianzaw hi.

⁶Vantung le leitung, tuipi le a thukna sung khempeuhah TOPA in ama ut peuhpeuh a bawl hi.

⁷Amah in leimong panin meiipi kaisakin, guahzuk nadingin khuaphialepte bawl a, a huihkua panin huih a pusuaksak hi.

⁸Amah in Egypt gam sungah mihing ganhing tacil khempeuh a vatmai hi.

⁹Egypt aw, nangma sungah lim le na lamdangte, Faro le a nasem khempeuhte gimpiakna-in a lak hi.

¹⁰Minam tampite vatmai-in kumpi vangliante that a,

¹¹Amor kumpipa Sihon, Bashan kumpipa Og le Kanaan kumpite a that hi.

¹²Amau’ leitang khempeuh, ama mi Israel-te’ luah dingin a piakhia hi.

¹³TOPA aw, nangma min kip tawntung hi. TOPA aw, na minthanna khang tawntungin a kip hi.

¹⁴Bang hang hiam cih leh TOPA in ama mite’ thu khenin, ama nasemte tungah hehpihna a nei ding hi.

¹⁵Minam dangte’ pasian-te pen mihingte’ khut tawh a kibawl, ngun le kham ahi hi.

¹⁶Amaute in kam nei napi, pau thei lo uh hi. Amaute in mit nei napi, khua mu thei lo uh hi.

¹⁷Amaute in bil nei napi, khua za thei lo uh hi. Amaute’ kam sungah naksuk naktoh theihna nei lo uh hi.

¹⁸Milim a bawl mite pen milim mah bangsak in. Milim a muang khempeuhte zong tua milimte mah bangsak in.

¹⁹Israel mite aw, TOPA phat un. Aaron’ innkuante aw, TOPA phat un.

²⁰Levi mite aw, TOPA phat un. TOPA a zahtakte aw, TOPA phat un.

²¹Jerusalem inn-a a nei, Zion-a om TOPA in thupha ngah tahen. TOPA phat un.