Read Tedim Chin Late 139 Bible Online

Late 139 - Tedim Chin bible

Late 139

¹TOPA aw, nangmah in kei na hong entel a, nong thei khin hi.

²Nangmah in ka heksukna, ka hektohnate na thei hi. Nangmah in ka ngaihsutnate gamlapi pek panin na thei hi.

³Nangmah in ka sep laitak ahi a, ka khawl laitak ahi zongin na hong mu a, ka gamtatna khempeuh a vekpi-in na thei hi.

⁴TOPA aw, kam khat bek nangawn ka paukhiat ma-in, nangmah in ka gen dingteng a vekpi-in na thei khin hi.

⁵Nangmah in ka nung le ka mai-ah nong dal a, na thahatna tawh kei na hong hu hi.

⁶Tua bangin kei nong theihna pen kei a dingin lamdang lua mahmah a, thuthuk lua ahih manin kei’ theihtel zawh ding hi lo hi.

⁷Nangmah a pelh dingin koi-ah pai ding a, nangma omna panin koi lai-ah taikhia ding ka hi hiam?

⁸Vantungah kahto leng tua lai-ah nang na om ding a, Leinuai misite’ gamah lupna bawlta leng zong tua lai-ah zong nang na om veve ding hi.

⁹Leimong pekah leengin, tuipi mong pekah omta leng zong,

¹⁰tua lai nangawnah nangma khut in kei hong paipihin, na khut taklam in kei hong len ding hi.

¹¹“Khuamial in kei hong tuamcip hen la, ka kiima khuavak omte zan khuamial suak hen,” ci taleng zong,

¹²tua nangawnah, nangma a dingin khuamial pen mial lo a, zan khuamial pen sun nitaang tawh kibang hi. Bang hang hiam cih leh nang a dingin khuamial pen khuavak mah bang lel hi.

¹³Bang hang hiam cih leh ka pumpi na khempeuh na hong piangsak a, ka nu’ gil sungah keimah nong khuituah hi.

¹⁴Kihtak dingin a kilawm na hih manin nang ka hong phat hi. Na nasepnate lamdang mahmah! Nangmah in kei nong lim theih mahmah hi.

¹⁵A thukna sung mun simthamah kei hong kikhuituahin hong kibawl laitakin, ka guh ka taang, na mai-ah kiliah lo hi.

¹⁶A kipiangsak nai lo keima pumpi nate na mit in a mu hi. Ka pumpi nate khat beek a om ma, ka ni zah ding a kiciangtan laitakin, tuate khempeuh na laibu sungah kigelh khin hi.

¹⁷Pasian aw, na ngaihsutnate kei a dingin manpha mahmah a, tuate khempeuh a vekpi-in zai mahmah hi.

¹⁸Tuate a mal sim leng sehnel sangin tamzaw hi. Ka khanlawh ciangin nang tawh ka omkhawm lai hi.

¹⁹Pasian aw, migilote that inla, kei kiang panin mi that theite paikhia sak in.

²⁰Bang hang hiam cih leh amaute in nang hong dem uh a, ngimna hoih lo tawh nang hong pang uh hi.

²¹TOPA aw, nang hong mudah mite ke’n mudah hi lo ka hi hiam? Nang’ langah hong pangte ke’n kih hi lo ka hi hiam?

²²Amaute ka mudah mahmah a, amaute ka galin ka seh hi.

²³Pasian aw, kei hong entel inla, ka lungsim hong thei in. Kei hong sit inla, ka ngaihsutnate hong thei in.

²⁴Kei sungah siattheihna a omkha hiam hong en inla, tawntung lampi-ah kei hong kha in.