Read Tedim Chin Late 14 Bible Online

Late 14 - Tedim Chin bible

Late 14

¹Mihaite in a lungsim sung uhah, “Pasian om lo hi,” ci-in ngaihsun uh hi. Amaute sia uh a, kihhuai gamtat uh a, a hoihin a gamta kuamah om lo hi.

²A pil gamtat, Pasian a zong a om uh hiam, cih a theih nadingin TOPA in vantung panin mihingte hong ensuk hi.

³Amaute khempeuh a vekpi-un pukkhin uh hi. A kibangin sia kim uh a, a hoihin a gamta khat zong om lo hi.

⁴TOPA’ tungah thu a ngen lo, annek bangin ka mite a netum, siatna a bawlte in thutheihna nei lo ahi hiam?

⁵Launa lianpi sungah amaute om ding uh hi; bang hang hiam cih leh Pasian in midikte ompih hi.

⁶Mizawngte’ geelna susia nuam uh a, ahih hangin TOPA pen mizawngte’ belh ahi hi.

⁷Israel-te a’ ding hotkhiatna Zion panin hong tunna ding thu ka ngenngen hi. TOPA in ama mite tungah nopsakna a piakkik ciangin, ama mi Israel-te kipak mahmah ding uh hi.