Read Tedim Chin Late 141 Bible Online

Late 141 - Tedim Chin bible

Late 141

¹TOPA aw, nang kong sam hi; hong kinawh in. Nang kong sap ciangin ka aw hong ngai in.

²Ka thungetna pen na mai-ah paknamtui bangsak inla, ka khutte ka laptohna pen nitak biakpiakna bangsak in.

³TOPA aw, keima kam a cing ding khat koih inla, ka mukte’ kongkhak a vil ding khat koih in.

⁴Mawh bawlnopna lungsim hong neisak kei inla, a gilo mite tawh hong kikhawlsak kei in. Amau’ anlimte hong duhgawh sak kei ta in.

⁵Mipha pa kei hong vuasak inla, ahih hangin migilote ka lu sathau nilhsak kei in; bang hang hiam cih leh amau’ gitloh gamtatnate nakpitakin langpangin thu ka ngenngen hi.

⁶Amaute, thu kisitin mawhsakna a thuak uh ciangin, TOPA’ thute man hi, ci-in a thei ding uh hi.

⁷Mi khat in suangpi khat sukhamin leitungah a thehthang gawp bangin Leinuai’ kongvangah amau’ guhte kithehthang hi.

⁸Ahih hangin TOPA Pasian aw, nang ka hong muang tawntung a, nangmah ka hong bel hi. Tua ahih manin kei hong nusia kei in.

⁹Amaute in kei hong siahna uh tehlop le siatna bawlte’ thangzak panin kei hong kem in.

¹⁰Kei ka suahtak khit ciangin amau’ ngenthang sung mahah migilote awksak in.