Read Tedim Chin Late 145 Bible Online

Late 145 - Tedim Chin bible

Late 145

¹Ka Pasian le ka Kumpipa aw, nangmah hong pahtawi-in a tawntungin nangma min kong phatphat ding hi.

²Nisimin hong pahtawi-in a tawntungin nangma min kong phatphat ding hi.

³TOPA lian hi; nakpitakin phat ding hi a, ama liatna ngaihsutzawh ding hi lo hi.

⁴A khang a khangin nangma nasepnate kiphatphat ding a, a vanglian na bawlnate kigengen ding hi.

⁵Na liatna le na minthanna a lamdang nangma sepnate ka lungngaingai ding hi.

⁶A vanglian nangma bawlnate mite in taangko ding uh a, nangma vangliatna mah kei zong ka pulak ding hi.

⁷Amaute in nangma liatna, na minthanna genkhia-in nangma thumanna nakpitakin sa ding uh hi.

⁸TOPA dikin hehpihna nei a, heh hak mahmahin itna kip lianpi a nei hi.

⁹TOPA pen mi khempeuh tungah hoih a, a bawlsa khempeuh tungah hehpihna a nei hi.

¹⁰TOPA aw, nangma bawlsa khempeuh in nangma tungah lungdamna hong ko ding uh a, na mi siangtho khempeuh in nang hong phat ding uh hi.

¹¹Amaute in na kumpi gam a minthanna thu gengenin na vangliatna thu sutsut ding uh a,

¹²a vanglian nangma sepnate le na kumpi gam a hoihna, a minthannate mi khempeuh tungah kitheisak ding uh hi.

¹³Nangma kumpi gam pen a kip tawntung kumpi gam hi a, nangma ukna khang tawntungin a kip hi. A thuciamna khempeuhah TOPA thutak mahmah a, a gamtatna khempeuhah zong hehpihna a nei ahi hi.

¹⁴TOPA in a puk mite khempeuh huh a, niamsakna a thuakte khempeuh a sangtosak hi.

¹⁵Nuntak husanna a nei khempeuhte’ mit in nang hong en uh a, a hun a tun ciangin amaute an na vak hi.

¹⁶Nangmah in na khut na hong a, nuntak husanna a nei khempeuhte’ deihna a kicingin na pia hi.

¹⁷TOPA pen a sepna khempeuhah thutang a, a gamtatna khempeuhah hehpihna a nei hi.

¹⁸Amah a sam mi khempeuh kiangah TOPA nai om a, lungsim takpi tawh a sam mi khempeuh kiangah amah nai om hi.

¹⁹Amah a zahtakte’ deihna a kicingin tungsak a, amaute’ kikona zong za-in amaute a honkhia hi.

²⁰TOPA in amah a itte khempeuh kem a, ahih hangin migilo khempeuh amah in susia ding hi.

²¹TOPA ka phat tawntung ding hi. Mi khempeuh in a tawntungin ama min siangtho phat ta uh hen.