Read Tedim Chin Late 146 Bible Online

Late 146 - Tedim Chin bible

Late 146

¹TOPA phat un. Ke’n, TOPA ka phat ding hi.

²Ka hin laiteng TOPA ka phat ding a, ka nuntak laiteng ka Pasian’ tungah phatnate ka sa ding hi.

³Huhna a hong pia thei lo uliante ahi a, mi mawkmawkte ahi zongin muang kei un.

⁴A husanna a bei ciangin lei-ah ciahkik uh a, tua ni mahmahin a ngaihsutnate uh beita hi.

⁵Jakob’ Pasian pen amah huhpa hi-in, ama TOPA Pasian a muang mipa mi lungdam ahi hi.

⁶Amah in van le lei, tuipi le tuate sungah a om khempeuh bawl a, a tawntungin thuman hi.

⁷A kinengniam mite a dingin thumanna semkhia a, gilkialte an a vak hi. TOPA in thongkiate a khahkhia hi.

⁸TOPA in mittawte khua a musak hi. TOPA in niamsakna a thuak mite sangtosak a, TOPA in thuman mite a it hi.

⁹TOPA in peemtate kem a, meigong numeite le pa nei lote a huh hi. Ahih hangin amah in migilote’ vaihawmna a suksiatsak hi.

¹⁰Zion aw, nangma Pasian TOPA in khang tawntungin uk ding hi. TOPA phat un.