Read Tedim Chin Late 16 Bible Online

Late 16 - Tedim Chin bible

Late 16

¹Pasian aw, nang hong bel ka hih manin keimah hong kem in.

²TOPA tungah, “Nang, ka TOPA na hi hi; nang tawh loin hoihna ka nei kei hi,” ka ci hi.

³Leitungah a om mi siangthote ahih le, amaute nampi hi a, amaute sungah ka lungkimna teng om hi.

⁴Pasian dang a teelte in amau’ dahna khangsak hi. Amau’ si theh biaknate ke’n bawlpih loin, amau’ pasian-te ka biakpih kei ding hi.

⁵TOPA pen keima luah dinga ka teelsa, keima muanpi na hi a, keima ngah ding khempeuh na khut sungah om hi.

⁶Kei-a’ pen mun nuam mahmah sung hong tu ahih manin gamhluah hoih nei ka hi hi.

⁷Ngaihsutna a hong lak TOPA ka phat a, zanin zong ka lungsimah hong suak hi.

⁸TOPA ka maingat tawntung a, ka taklamah amah om ahih manin ka kiling kei ding hi.

⁹Tua ahih ciangin lungdamin ka kipak a, lungmuangin ka om hi.

¹⁰Bang hang hiam cih leh Leinuai nong zuansak kei a, na mihoih pa Leihawmpi na musak kei hi.

¹¹Nangmah in nuntakna lampi keimah nong lak hi. Nangma omna munah lungdamna lianpi om a, nangma taklamah nop tawntungnate a om hi.