Read Tedim Chin Late 22 Bible Online

Late 22 - Tedim Chin bible

Late 22

¹Ka Pasian, ka Pasian aw, bang hangin kei hong nusia na hi hiam? Nong huhna ding ka hong thumna panin bang hangin gamla om na hi hiam?

²Ka Pasian aw, sunin kong kiko a, ahi zongin nong dawng kei hi. Zanin zong ka kiko a, ahi zongin lungsim nopna ka mu thei tuan kei hi.

³Ahih hangin nang na siangtho a, Israel-te’ pahtawi-in na tu hi.

⁴Ka pate un nangmah hong muang uh hi. Amaute in hong muang uh a, nangmah in amaute na honkhia hi.

⁵Nangma tungah amaute in hong ko uh a, amaute kihon hi. Nangmah hong muang uh a, guaksuak lo uh hi.

⁶Ahih hangin kei pen lungno khat bang lel ka hi a, mi ka bang kei hi. Mite’ ko gawpgawp, mite’ simmawh ka hi hi.

⁷Hong mu mi khempeuh in kei hong zahko-in, hong mukpiksan uh a, a lu uh hong peisan hi.

⁸“TOPA’ tungah amah in ama thu ap hi. Amah kihonkhia sak un; amah deih ahih manin honkhia ta hen!” hong cihsan uh hi.

⁹Ahih hangin nang pen gil sung panin kei a hong suaksakpa na hi a, ka nu’ ang sungah a muanhuai-in keimah na hong kem hi.

¹⁰Ka suah tung a kipan nangma tungah kong tung a, ka nu in hong paii lai a kipan keima Pasian na hi hi.

¹¹Haksatna nai ahih manin kei tawh kigamla om kei in; kei a hong huh ding kuamah dang om lo hi.

¹²Bawngtal tampi tak in kei hong umcih uh a, Bashan gam bawngtal hatte in kei hong umcih uh hi.

¹³Humpinelkai hawk, a sabawh nuam bangin amaute in kei hong kamkat beba uh hi.

¹⁴Tui buakkhiat bangin kei hong kibuakhia a, ka guh ka taang khempeuh kilawi mangkhin hi. Ka lungtang khuainun bang a, ka awm sungah tuisuak hi.

¹⁵Ka thahatna, leibeel phel bangin keu a, ka leii zong toncip ta hi. Nangmah in leivui sungah kei na hong koih hi.

¹⁶Ka kiimah uite om a, siatna bawl mi honkhat in kei hong umcih uh hi. Ka khut ka khete hong sunletzo uh hi.

¹⁷Ka guh khempeuh kimu thei hi. Amaute in hong sal gega uh hi.

¹⁸Amaute in ka puante hawm uh a, ka puan a hawm nadingun lai ai a san uh hi.

¹⁹Ahih hangin TOPA aw, gamla om kei in. Keimah a hong huhpa aw, a huh dingin hong manlang in.

²⁰Namsau panin keimah hong hon inla, uite’ kiang panin ka nuntakna hong hon in.

²¹Humpinelkai kam panin keimah hong hon inla, gamsialte’ ki panin a cimawh keimah hong hon in.

²²Ka u ka naute tungah nangma min ka gen ding a, mihon kikhopna laizangah nangmah kong phat ding hi.

²³TOPA a zahtak mi khempeuh aw, amah phat un. Jakob’ suan mi khempeuh aw, amah minthangsak un. Israel mi khempeuh aw, amah lamdang sa un.

²⁴Bang hang hiam cih leh amah in a thuak mi’ gimna simmawh bawl lo a, zong kihbawl lo hi. Ama kiang pan a mai seello a, ama tungah a koh ciangin, amah in a za hi.

²⁵Mihonpite lakah nang ka hong phatna ding na piangsak a, nang a hong zahtakte’ mai-ah ka thuciamna kong pia ding hi.

²⁶Gimna a thuakte in kham takin ne ding uh a, amah a zongte in TOPA phat ding uh hi. A lungsim uh nuam tawntung ta hen!

²⁷Leitung mi khempeuh in phawkin TOPA’ lamah kihei ding uh a, minam khempeuh in ama mai-ah bia ding uh hi.

²⁸Bang hang hiam cih leh ukna pen TOPA a’ hi a, minamte tungah amah in a uk hi.

²⁹Hi hi, a kiphasak mi khempeuh ama mai-ah kunsuk ding uh a, a sithei mihing khempeuh ama mai-ah kun ding uh hi.

³⁰A hong khangkik mite in ama na sem ding uh hi. Mite in a hong piang lai ding mite tungah TOPA’ thu gen ding uh a,

³¹a suak nai lo mite tungah ama sepsa, hotkhiatna thu gen ding uh hi.