Read Tedim Chin Late 25 Bible Online

Late 25 - Tedim Chin bible

Late 25

¹TOPA aw, nangma tungah thu ka hong ngen hi.

²Ka Pasian aw, nangmah ka hong muang hi. Hong zahhuaisak kei in. Keima tungah ka galte gualzo-in lungdamsak kei in.

³Nangmah a hong ngakte kuamah zahhuaisak kei in. Thukhual loin a zuau theite zahhuaisak in.

⁴TOPA aw, na zia na tong a thei-in hong bawl inla, na lampite hong hilh in.

⁵Na thuman sungah kei hong paipih inla, lam hong hilh in. Bang hang hiam cih leh kei a hong hon Pasian na hi a, nang kong muang tawntung hi.

⁶TOPA aw, tanglai pek a kipan a omsa ahih manin, na hehpihna le na itna kip hong phawkkik in.

⁷TOPA aw, ka khangno lai-a ka mawhna le ka khialhnate ciamteh kei inla, na hoihna na ngaihsutna le na itna kip tawh kizui-in kei hong phawk in!

⁸TOPA hoihin thutang hi. Tua ahih manin mimawhte lam a hilh hi.

⁹Amah in lungsim kiniamkhiatte a manah paipihin a zia a tong a hilh hi.

¹⁰Ama thuciamna le a thupiak a zuite a dingin TOPA’ lampi pen itna kip le cihtakna ahi hi.

¹¹TOPA aw, ka mawhna lian ahih manin, nangma min phat nadingin keima mawhna hong maisak in.

¹²TOPA a zahtak mi kua ahi hiam? Ama lampi zuih ding Pasian’ hilhna a ngah mi ahi hi.

¹³Amah nuamsa tawntung ding a, a tate in leitang nei ding uh hi.

¹⁴TOPA tawh kilawmtatna pen amah a zahtakte a’ ding hi a, a thuciamna amau tungah kitheithangsak hi.

¹⁵TOPA’ lam ka en tawntung hi; bang hang hiam cih leh amah in ngenthang panin ka khete hong sutkhia ding hi.

¹⁶Kei lamah nang hong kihei-in, kei hong hehpih in; bang hang hiam cih leh kei guakbek hi-in gimna ka thuak hi.

¹⁷Ka lungsim natnate khempeuh hong damsak inla, ka gimnate khempeuh panin hong paikhiatpih in.

¹⁸Ka gimna le ka thuaknate hong ngaihsun inla, ka mawhna khempeuh hong maisak in.

¹⁹Ka galte bangzah takin a tamna le kei hong muhdah luatnate hong ngaihsun in.

²⁰Kei hong cing inla, hong honkhia in. Nangmah hong bel ka hih manin kei hong maizumsak kei in.

²¹Nang hong muang ka hih manin, kicinna le thutanna in kei hong kem tahen.

²²Pasian aw, amau’ haksatna khempeuh panin na mi Israel-te honkhia ta in.