Read Tedim Chin Late 30 Bible Online

Late 30 - Tedim Chin bible

Late 30

¹TOPA aw, nangmah hong phatin ka diang ding hi. Bang hang hiam cih leh kei nong laamto khin a, ka tungah ka galte na lungdamsak kei hi.

²TOPA ka Pasian aw, huhna a hong ngenin nang tungah kong awng a, kei na hong damsak khin hi.

³TOPA aw, Leinuai panin kei nong paikhiatpihto khin a, Leihawm sungah a pai khinsate lak panin kei nong nungta kiksak hi.

⁴Ama mi siangthote aw, TOPA tungah phatna la sa-in ama tungah lungdamna ko un.

⁵Ama hehna tomno sung bek hi a, ama hong deihsakna pen khang tawntung ading ahi hi. Zan hun sungteng kahna omkha mah ding a, ahih hangin zing khuavak tawh nuamna hong tung hi.

⁶Keimah in ahihleh, ka daupai laitakin, “Ka kiling ngei kei ding hi,” ka ci kha hi.

⁷TOPA aw, nong deihsakna tawh mual kip bangin kei nong phut khin hi. Ahi zongin tu-in na maitang na seel a, kei ka khasia hi.

⁸TOPA aw, nangma tungah kong kiko a, TOPA tungah kong thum hi:

⁹“Leihawm sungah paisukin ka sihna-ah bang meetna om ahi hiam? Leivui in nang hong phat ding ahi hiam? Na thumanna gen ding ahi hiam?

¹⁰TOPA aw, hong za inla, kei hong hehpih in. TOPA aw, keimah huhpa hong hi in,” ka ci hi.

¹¹TOPA ka Pasian aw, nangma tungah lungdamna ka hong koh tawntung theih nading, ka lungsim in nang hong phat theih nading, a dai om mawk loh nadingin ka thumna le ka taunate lamna tawh nong heisak a, dahna lim ahi ka puanhampi hong suahkhiat sakin nuamna na hong guan hi.