Read Tedim Chin Late 31 Bible Online

Late 31 - Tedim Chin bible

Late 31

¹TOPA aw, nang kong bel hi. Hong maizumsak ngei kei inla, na thumanna tawh kei hong honkhia in!

²Na bil hong ngat inla, hong hon pak in! Ka belh ding suangpi hong hi inla, kei hong dal ding munkip muanhuai hong hi in!

³Nang pen ka suangpi le ka munkip muanhuai na hi hi. Nangma min ngaihsutna tawh kei hong kha-in lam hong lak inla,

⁴keima belh pa na hih manin hong kisiahna ngenthang panin kei hong lakhia in.

⁵Nangma khut sungah keimah kong ki-ap hi. TOPA, a thuman Pasian aw, keimah na hong hon ding hi.

⁶Mawkna milim a thupi ngaihsutte na mudah hi; ahih hangin keimah in TOPA ka hong muang hi.

⁷Na itna kip hangin lungdamin ka kipak ding hi. Bang hang hiam cih leh ka thuakna mu khinin, ka kamsiatna-ah na hong don khin hi.

⁸Galte’ khut sungah kei na hong pia kei a, mun tanzau-ah ka khe na dingsak hi.

⁹TOPA aw, genthei ka hih manin kei hong hehpih in. Dahna hangin ka mit thuk a, ka lungsim le ka pumpi zong gim mahmah ta hi.

¹⁰Bang hang hiam cih leh ka nuntakna dahna vive hi a, ka hunte khuisatna vive ahi hi. Ka gentheihna hangin ka tha kiamgawp ta a, ka guhte zong ngaam ta hi.

¹¹Ka vengte khempeuh’ nuihsat ka suak a, ka vengte tungah a cikzethuai ka hi a, ka meltheih khempeuhte’ gimneih mi ka suak hi. Konglakah hong mute in kei hong peelin hong taisan uh hi.

¹²Misi bangin kei hong kiphawk nawn lo a, beel kitam khat tawh ka kibang lel ta hi.

¹³Ka galte’ kihuauna ka za a, ka kiim ka pamah launa om hi. Kei hong langpangin amaute in vai hawmkhawm a, thah dingin kei hong sawm uh hi.

¹⁴Ahih hangin nang kong muang hi, TOPA aw. Keima Pasian na hi hi.

¹⁵Keima nuntakna nangma khut sungah om hi. Keima galte le kei a hong bawlsiate’ khutsung panin kei hong honkhia in!

¹⁶Na nasempa tungah na mai hong taangsak inla, na itna kip tawh kei hong hon in!

¹⁷TOPA aw, nangma tung panin huhna hong ngen ka hih manin kei hong maizumsak kei in. Migilote maizumsak inla, amaute a pau ding thei loin Leinuai-ah paisak in.

¹⁸Thumante’ langah pang a, kihihsak pau-in, kiphatsakna le simmawhna tawh pau-in zuauthu a gen mite a pau thei loin omsak in.

¹⁹Nang hong zahtakte a dingin na koihsa na hoihte, nang hong beelte a dingin mite’ muhna-ah na bawl, nangma hoihna kicing a, mi khempeuh in thei uh hi.

²⁰Mite’ sawmsimna panin na omna huam sungah amaute na seel a, kitotna mun panin na buk sungah a muanhuai-in amaute na kem hi.

²¹Gal in khuapi a umcih bangin kei hong ki-umcih hun lai-in a itna kip a lamdangin kei tungah hong lak ahih manin TOPA in thupha ngah tahen.

²²Lauthawngna tawh, “Nangma muhna panin a gamlapi-ah kei hong notkhia hi,” ka ci khin hi. Ahih hangin nang tungah huhna ka hong nget ciangin keima hong thumnate nangmah in na hong za hi.

²³Ama mi siangtho khempeuh aw, TOPA phat un! Pasian in thuman mite kem a, ahih hangin a kiphatsak gamtatte nakpitakin a thuk hi.

²⁴TOPA a ngak mi khempeuh aw, na tha uh khauhsak unla, na lungsim uh hangsak ta un!