Read Tedim Chin Late 41 Bible Online

Late 41 - Tedim Chin bible

Late 41

¹Mi genthei a khualte thupha ngah ahi hi. TOPA in haksatna hunah amaute honkhia ding hi.

²TOPA in amaute hu-in hingsak ding a, leitungah amaute thupha ngah mi kici ding hi. Amau’ galte’ khut sungah amaute pia lo ding hi.

³A ci uh a nat ciangin TOPA in amaute kem ding a, a cinatna khempeuh uh damsakkik ding hi.

⁴Ke’n ahihleh, “TOPA aw, kei hong hehpih inla, kei hong damsak in; bang hang hiam cih leh nang tungah kong khialzo hi,” ka ci hi.

⁵Ka galte in elna tawh keima thu gen uh a, “Cik ciangin amah a si tam, cik ciangin a min a mang tam,” ci uh hi.

⁶Keimah a en dingin mi hong pai ciangin, kam mawkna a pau uh hi. A lungsim uhah siatna kaikhawm uh a, a paikhiat uh ciangin a genthang uh hi.

⁷Kei hong mudah khempeuh in keima thu kihuauhuau uh a, kei a dingin a sia thei pen ding a geelgeel uh hi.

⁸Amaute in, “Amah nak gim mahmah hi. A lupna panin thokikzo nawn lo ding hi,” ci uh hi.

⁹Ka muan, ka lawm it pa, keima an a ne pa nangawn in a khetul tawh kei hong peek vial hi.

¹⁰Ahih hangin, TOPA aw, amaute na thukkik theih nadingin kei hong hehpih inla, hong damsak in.

¹¹Ka galte in keimah hong zo lo ding a, keima tungah nong lungkimna ka thei ding hi.

¹²Keima hoihna hangin na hong huh ding a, nangma omna-ah nong omsak tawntung ding hi.

¹³Israel Pasian, TOPA in khang tawntungin thupha ngah tahen.