Read Tedim Chin Late 48 Bible Online

Late 48 - Tedim Chin bible

Late 48

¹TOPA lian a, i Pasian’ khuapi sungah nakpitakin phat ding ahi hi.

²Kumpi lianpa’ khuapi, leilu lama a om ama mual siangtho hoihin a sang mahmah Zion mual pen leitung khempeuh’ lungdamna ahi hi.

³A muanhuai tua mualah amah a hu taktakpa ahihna Pasian in a lakkhin hi.

⁴Ahi zongin, kumpite kikaikhawmin, a sim dingin hong kuankhawm uh hi.

⁵Amaute in Zion a muh phetun lamdangsa mahmah uh a, dipkua vatin tai uh hi.

⁶Numei nausuak na a sa bangin amaute linggawp uh hi.

⁷Nisuahna huihpi tawh Tarshish kici teembaw liante nang na susia hi.

⁸Ka zaksa bangun Vanglian TOPA’ khuapi, i Pasian’ khuapi, Pasian in a phuhkip ngitngetna ka mu khin uh hi.

⁹Pasian aw, na biakinn sungah nangma itna kip ka ngaihsun uh hi.

¹⁰Pasian aw, na min in leimong dong a zelh bangin, nangmah hong kiphatna in zong a zel hi. Na taklam khut gualzawhna tawh a kidim hi.

¹¹Zion Mual lungdamsak in. Na thukhenna hangin Judah mite lungdamsak in.

¹²Hih pen eima Pasian hi a, a tawntungin eima Pasian hi, ci-in khangkikte tungah na gen theih nadingun Zion kiimvelin pai-in, a tausang phazah sim unla, a kulh phungmai a hoih mahmahte ngaihsunin, a phualpi muanhuaite va nawk kim un. Amah pen a tawntungin lam hong lak ding pa ahi hi.