Read Tedim Chin Late 5 Bible Online

Late 5 - Tedim Chin bible

Late 5

¹TOPA aw, kong paunate hong ngai inla, ka hong thumnate hong thudon in.

²Ka kumpi le ka Pasian aw, nangma tungah hong thum ka hih manin ka kikona aw hong ngai in.

³TOPA aw, zingsang simin ka aw nong za a, zingsang simin nangma a dingin biakna bawlin kong ngak hi.

⁴Bang hang hiam cih leh gitlohna lamsang a deih Pasian na hi kei a, siatna pen tawlkhat zong nang tawh a omkhawm thei ahi kei hi.

⁵A kisathei mite nangma mit tawh kituak lo a, siatna a bawlte khempeuh nangmah in na mudah hi.

⁶Zuauthu a gen mite nangmah in na susia hi. TOPA in mi thahnopna lungsim le mi khemnopna lungsim a neite a mudah hi.

⁷Kei ahihleh a kicing itna kip suangin na inn sungah ka tum ding a, nangmah zahtakna tawh kunin a siangtho na biakinn lam nga-in kong bia ding hi.

⁸TOPA aw, gal tampi nei ka hih manin na thumanna tawh kei hong makaih inla, keima mai-ah na lampi taangsak in.

⁹Bang hang hiam cih leh amau sungah thuman om lo hi. Amau lungsimah siatna bek ngaihsun uh a, amau’ gawlgui pen a kihongsa hankhuk tawh kibang hi. A kam uh tawh mawk phat uh hi.

¹⁰Pasian aw, a mawhna uh amau mah thuaksak inla, amau’ thu mah tawh amaute puksak in. Amaute in nangmah hong lehdo uh ahih manin amau’ mawhna tampite hangin amaute paaikhia in.

¹¹Ahih hangin nang hong belte khempeuh lungdamsak inla, nuamna la sasak tawntung in. Nangma min a deihte nangma hangin gualzo-in a lungdam theih nadingun amaute na hu hi.

¹²TOPA aw, thuman mi thupha na pia a, lum tawh dal bangin deihsakna tawh na dal hi.