Read Tedim Chin Late 56 Bible Online

Late 56 - Tedim Chin bible

Late 56

¹ Pasian aw, mite in kei hong tuancil ahih manin kei hong hehpih in. Sunthapai-in galte in kei hong sucip hi.

²Sunthapai-in ka galte in kei hong tuancil uh a, kiphatsakna tawh mi tampi in kei hong do hi.

³Kei ka lau ciangin nangmah ka hong muang hi.

⁴A thu ka phat Pasian’ sungah, lunghihmawhna khat zong nei hetloin Pasian ka muang hi. Mihing ahi lelte in kei, bang hong cihzo ding ahi hiam?

⁵Amaute in ka vai siatsak ding sunthapai-in hanciam uh a, amau’ ngaihsutnate khempeuh keima siatna ding ahi hi.

⁶Amaute kikaikhawmin keimah hong buk uh a, ka gamtatna khempeuh hong encik uh hi. Amaute in keimah thah ding a hanciam uh bangin,

⁷amau’ khialhna hangin amaute thuk in. Pasian aw, hehna tawh tua mite lawnkhiasuk in.

⁸Ka sin linnate khempeuh nangmah in na ciamteh khin hi. Ka khituite khempeuh na thawl sungah thun in. Tuate na laibu sungah kiciamteh hi lo ahi hiam?

⁹Tua ciangin, keimah in kong koh ni peuh ciangin ka galte nungkik ding hi. Pasian pen keima-a’ ahihna ka thei hi.

¹⁰A thu ka phat Pasian’ sungah, a thu ka phat TOPA’ sungah,

¹¹lunghihmawhna khat zong nei hetloin Pasian ka muang hi. Mihing lellelte in kei, bang hong cihzo ding ahi uh hiam?

¹²Pasian aw, nang tungah ka kiciamna ka zuih kul hi. Nangma tungah lungdamna kong thuk hi.

¹³Bang hang hiam cih leh sihna panin nong honkhia khin hi. Pasian’ mai, nuntakna khuavak sungah ka pai theih nadingin ka khe a taalna ding panin na hong honkhia hi.