Read Tedim Chin Late 72 Bible Online

Late 72 - Tedim Chin bible

Late 72

¹Pasian aw, nangma thutang, kumpipa hilh inla, nangma thuman, kumpi tapa hilh in.

²Amah in thumanna tawh na mite tungah thu khen hen la, na mizawngte tungah thu a tangin khen tahen.

³Mual liante le mual neute in thumanna tawh na mite a dingin nopna tampi piangsak tahen.

⁴Amah in mizawngte a’ ding thu a manin khen hen la, mi cimawhte tungah suahtakna pia-in, midang a nengniamte sucipgawp tahen.

⁵Ni le kha a omlaiteng, khang tawntungin amah hing tahen.

⁶Amah pen pawn lak lopa tungah a kia guah, lei a kawtsak guahzu tawh kibang tahen.

⁷Ama hun sungin thuman pung hen la, khapi a bei mateng nopna om tahen.

⁸Ama ukna, tuipi khat pan tuipi khat, Gunpi panin leimong dongin om tawntung tahen.

⁹Ama galte khempeuh ama mai-ah kun uh hen la, amah a langpangte leilak kidenna uh hen.

¹⁰Tarshish kumpite le tuikulh neu-a kumpite in ama tungah siah pia uh hen la, Sheba le Seba kumpite in letsong puak ta uh hen.

¹¹Kumpi khempeuh ama mai-ah bok uh hen la, minam khempeuh in ama na sem ta uh hen.

¹²Bang hang hiam cih leh mi cimawhte in a koh ciangin amah in honkhia a, mizawng, a huh ding a om lote amah in a honkhia hi.

¹³A thakiam, a cimawh mite amah in hehpih a, mi cimawhte’ nuntakna amah in a honkhia hi.

¹⁴Amah in amaute pammaihsa ahih manin netniamna le ngong hihna panin amaute a honkhia hi.

¹⁵Amah a khansau hen la, Sheba gam a khamte ama tungah kipia tahen. Ama a dingin thu kingetsak tawntung hen la, sunthapai-in ama a dingin thupha kingetsak tahen.

¹⁶Gam sung khempeuhah an tampi tak piang hen la, mual liante dawnah dim mema-in Lebanon gam hoih sung bang ta hen la, gamlak a lopate bangin khuapite sunga om mite pung ta uh hen.

¹⁷Ama min kip tawntung hen la, a minthanna kip paisuak hen. Ama hangin mite in thupha ngah hen la, minam khempeuh in amah pen thupha ngah pa, ci ta uh hen.

¹⁸Na lamdangte a bawl amah bek ahi Israel Pasian, TOPA in thupha ngah tahen.

¹⁹A minthang ama min in thupha ngah tawntung hen la, ama minthanna tawh leitung khempeuh kidim tahen. Amen! Amen!

²⁰Jessi’ tapa David’ thungetnate a beita ahi hi.