Read Tedim Chin Late 74 Bible Online

Late 74 - Tedim Chin bible

Late 74

¹Pasian aw, bang hangin kote hong paaikhia paisuak na hi hiam? Bang hangin na gam sunga om nangma tuute tungah heh na hi hiam?

²Tanglai-in na ngahsa na mihonte, nangma luah minam dingin na tatkhiatsate phawk in! Na tennasa Zion Mual hong phawk in.

³A sia densa munah hong pai in. Na biakinn sunga om khempeuh galte in susia khinta hi.

⁴Nangma galte mun siangtho laizangah awng uh a, amau’ dialte gualzawhna lim dingin a khai uh hi.

⁵Amaute pen tulak sing phatna-ah pai-in heipi tawh sing a phuk bang uh hi.

⁶Tua ciangin biakinn na a kizemte khempeuh sek-hei le sekpi tawh a satkham uh hi.

⁷Amaute in mei tawh na biakinn hal uh a, nangmah hong kibiakna mun a susia uh hi.

⁸Amaute in, “A vekpi-in zo mang khin ni,” kici uh a, gam sung tenga om Pasian biakna inn khempeuh mei tawh a hal uh hi.

⁹Kote in ka mailam thu ding uh ka thei kei uh hi. Kamsang khat zong om nawn lo a, bang tanvei hi ding, ci-in a thei kuamah ka om kei uh hi.

¹⁰Pasian aw, ka galte in bang tanvei hong thusim loin om ding ahi hiam? Langpangte in nangma min hong simmawh den ding ahi uh hiam?

¹¹Bang hangin na khut dokkik a, na khut taklam na ang-ah koihcip na hi hiam?

¹²Ahi zongin Pasian pen tanglai pek a kipanin kumpi hi tawntung a, hih leitungah a hong honkhia zelzel ngei ka Kumpi ahi hi.

¹³Na vangliatna tawh tuipi na khenkham a, tuite tunga gulpite’ lutangte na sukham hi.

¹⁴Nangmah in Awle’ lutangte na sukham a, amah pen, gamlak ganhingte’ nek dingin na pia hi.

¹⁵Ciktuite le luite na phulsak a, guntui luangte na kangsak hi.

¹⁶Sun pen nangma a’ hi a, zan zong nangma a’ mah ahi hi. Nangmah in ni le kha na bawl hi.

¹⁷Leitung gamgi khempeuhte le phalbi hun le khuakhal hunte na bawl khin hi.

¹⁸TOPA aw, galte in nang hong thusim lohna le, dawibia mite in nangma min a hong simmawhna hong phawk ta in.

¹⁹A cimawh mite a gal gilote uh khut sungah nusia kei inla, bawlsiatna a thuak mite mangngilh kei in.

²⁰Nangma thuciamna hong pi ngaihsut in; bang hang hiam cih leh leitung mun mialna khempeuh mi ngongtatte tawh kidim hi.

²¹A kisikcip mite zahhuaisak kei inla, mizawng le mi cimawhte nangma min kiphatsak in.

²²Pasian aw, tho inla, nangma thu-ah hong pang in. Dawibia mite in sun tawntungin nang a hong thusim lohna hong phawk ta in!

²³Nangma galte’ kikona aw, nang a hong langpangte a gamlum semsemna mangngilh kei ta in.