Read Tedim Chin Late 80 Bible Online

Late 80 - Tedim Chin bible

Late 80

¹Tuuhon bangin Josef a paipih, Israel Tuucingpa aw, ngai in! Kherub tungah a tupa aw,

²Efraim, Benjamin le Manasseh’ mai-ah taangkhia in! Na tha saan inla, kote a honkhia dingin hong pai ta in.

³Ka ngei uh hong bangsakkik in, Pasian aw. Kote khempeuh hong kihotkhiat theih nadingin na maitang hong taangsak in.

⁴Vanglian TOPA Pasian aw, na mite’ thungetna-ah bang tanvei sinso niloh ding na hi hiam?

⁵Nangmah in a an dingun amaute tungah khitui na pia a, amaute’ dawn dingin khitui tampi na pia hi.

⁶Nangmah in, ka vengte uh’ thusim lohin kote na hong bawl a, ka galte un hong thusim loin hong nuihsan uh hi.

⁷Ka ngei uh hong bangsakkik in, Vanglian Pasian aw. Kote khempeuh hong kihotkhiat theih nadingin na maitang hong taangsak in.

⁸Nangmah in Egypt panin leenggui khat na la a, minam dangte hawlkhia-in, tua leenggui na suan hi.

⁹Nangmah in tua leenggui a dingin leitang na hahsiang a, amah in zungthuk kha-in gam sung a dim hi.

¹⁰Ama liim in mual liante hoihtakin liimsun a, a hiang in taamtak sing liante hoihtakin khuh a,

¹¹tuipi lamah a hiangte zamin, a dawnngekte in Gunpi lam a zuan hi.

¹²Tua ahih ciangin, lampi-ah a pai mi khempeuh in a gah a lawhtheih nadingin, bang hangin nangmah in a daigawl suvang na hi hiam?

¹³Gamlak a om ngal in susiagawp a, zangsung sa khempeuh in kivakna-in nei uh hi.

¹⁴Hong kiheikik in, Vanglian Pasian aw. Vantung panin hong ensukin hong mu in. Na khut taklam in a suansa, hih leenggui hong don in.

¹⁶Amaute in mei tawh halin sattan gawp uh hi. Amaute heh et inla, susiagawp in.

¹⁷Ahih hangin nangma a dingin na hatsak mi’ tapa, na taklama om mipa tungah na thahatna guan in.

¹⁸Tua ciangin nang kiang panin ka kiheikik nawn kei ding uh hi. Kote hong nungtasak in, nang kong phat ding uh hi.

¹⁹Ka ngei uh hong bangsakkik in, Vanglian TOPA Pasian aw. Kote khempeuh hong kihotkhiat theih nadingin na maitang hong taangsak in.