Read Tedim Chin Late 97 Bible Online

Late 97 - Tedim Chin bible

Late 97

¹TOPA in uk hi. Leitung lungdam hen la, tuikulh neu tampite zong lungdam ta uh hen.

²Meiipite le khuamial sahpite ama kiimah om a, thumanna le thutannate ama tokhom bulpi ahi hi.

³Ama mai-ah mei pai a, ama kiima om a galte a kangtum hi.

⁴Ama khuaphialepte in leitung taangsak a, leitung in mu-in a ling hi.

⁵TOPA’ mai, leitung mi khempeuh’ TOPA’ mai-ah mual liante khuainun bangin a tuisuak uh hi.

⁶Vantungte in ama thumanna genkhia uh a, mi khempeuh in ama minthanna mu uh hi.

⁷Bangmah a man lo milimte a kisaktheihpih, milim a bia mi khempeuhte maizumin kikoih a, ama mai-ah pasian khempeuh kun uh hi.

⁸Pasian aw, Zion in za-in nuam a, na thukhennate hangin Judah khuapite lungdam uh hi.

⁹Bang hang hiam cih leh TOPA aw, leitung khempeuh a ukpa na hi a, pasian dang khempeuh sangin nakpitakin na lianzaw hi.

¹⁰TOPA in gitlohna a mudahte it a, amah in a mi siangthote’ nuntakna siatna ding pan a kem hi. Amah in migilote’ khutsung panin amaute a honkhia hi.

¹¹Thuman mite’ tungah khuavak hong taang a, lungsim thutang mite tungah lungdamna hong tung hi.

¹²Thuman mite aw, TOPA’ nasepnate hangin lungdam unla, ama min siangtho phat un.