Read Tedim Chin PAUNAK 1 Bible Online

PAUNAK 1 - Tedim Chin bible

PAUNAK 1

¹David’ tapa, Israel kumpi Solomon’ paunakte:

²Mite in pilna le thuhoihte a phawk theih nading, khiatna thuk a nei kammalte a theih theih nading.

³A hoihin a pil gamtat theih nading, thuman, thutang, a kilawmin a gamtat theih nading.

⁴Thuthei nai lote in a theih nading, khangnote in pilna le thu ngaihsut theihna a ngahna ding.

⁵Mi ciimsate ciimsak semsemin, mi pilsate pilsak semsemin,

⁶paunakte le thugentehnate hoihtakin thei-in, mipilte’ kampau leh a thugente uh a theih nading ahi hi.

⁷TOPA zahtakna in pilna kipatna hi a, mihaite in pilna le thuhilhna don lo uh hi.

⁸Ka ta aw, na pa’ hong thuhilhna hoihtakin zui inla, na nu’ hong thugente ngai in.

⁹Tua thuhilhnate in na gamtat hong hoihsak ding a, kizepna lukhu le kizepna khi bangin hong etlawmsak ding hi.

¹⁰Ka ta aw, mi hoih lote in nang hong zol ciangin, amau’ zolna zui kei in.

¹¹Amaute in, “Hong pai in, mi khatpeuh va that ni! Mi ommuang khat va muansuam ni!

¹²I muh tungin a cidam, a hing kimlai hinapi, i suk khit ciangin a sisa hi ding!

¹³Na a manpha a namkimin i sut ding a, tua bang nate i inn dimin i nei ding hi.

¹⁴Kote tawh hong kipawl lecin, i ngah khempeuh i hawm ding hi,” hong cih uh hangin ut kei in.

¹⁵Ka ta aw, tua bang mite tawh kikhawl kei inla, amaute kiang panin kihemkhia in.

¹⁶Amaute a sia-in gamta nuam vanvan uh a, mi thah ding lamsang haksa sa het lo uh hi.

¹⁷I matnop vasate’ muhtangpi-in, i siahna ngenthang zaak leeng a mawkna ahi hi.

¹⁸Ahi zongin mite in amau’ awkna ding mah thang siah uh a, kuamah dang awk loin, amau mah hai awk uh hi.

¹⁹Zawhthawh thu tawh mi’ na a sutte in sihlawh tawntung zaw a, hih bangin a gamtate in tua bangmah tuak ngitnget hi.

²⁰Ngai in! Kongzing lampi le van kizuakna phualpi-ah pilna hong kiko hi.

²¹Khuapi kulhkongpi tual le mi a kikhopna mun khempeuhah nakpitakin hong awngkhia a,

²²“Mihaite aw, bang tanvei hai omom nuam na hi uh hiam? Bang tanvei pilna thudon loin om ding na hi uh hiam? Pilna ngaihsutin nei ngei lo ding na hi uh hiam?

²³Kong thuhilhna hong ngai un; ka ngaihsutna kong gen ding a, ka theihna kong zasak ding hi.

²⁴Keimah in note hong samsam napi-in nong ngai nuam kei uh a, ka khut hong vanvan napi-in kuamah in nong thudon kei uh hi.

²⁵Ka thugente khempeuh hong thudon loin, kong tainate khempeuh hong mang nuam lo na hih manun,

²⁶lungkhamna na tuah uh ciangin kong nuihsan lel ding a, launa na tuah uh ciangin kong thusim kei ding hi.

²⁷Lungkhamna in huihpi’ nawk bangin note hong nawkgawpin, pingpei’ pei bangin note hong peigawpin, lungkhamna le sinkhamna na tuah uh ciangin kong don kei ding hi.

²⁸Tua bang hun ciangin kei nong sam ding uh a, ahi zongin kong dawng kei ding hi. Limtakin kei nong zong ding uh a, ahi zongin koimahah nong mu kei ding uh hi.

²⁹Note in pilna na deih kei uh a, TOPA na zahtak nuam kei uh hi.

³⁰Ka thugente na deih kei uh a, kong thuhilhna ngai nuam lo na hih manun,

³¹na gamtatna bangun na thuak ding uh a, nomau’ gamtatna mah in note hong gimsak ding hi.

³²Bang hang hiam cih leh thu thei lote in pilna a don loh manun sihlawh uh a, mihaite in lunghihmawhna a neih loh manun siatlawh uh hi.

³³Ahi zongin ka thugenna a ngaite in lungnopna ngah ding uh a, launa nei loin nuamtakin om hithiat ding uh hi,” a ci hi.