Read Tedim Chin PAUNAK 12 Bible Online

PAUNAK 12 - Tedim Chin bible

PAUNAK 12

¹Pilna a deihte, kithuhilh ding ut uh a, kitai ding ut lohna pen haina ahi hi.

²Mihoihte in TOPA’ maipha ngah a, siatna a gamtate amah in a mawhsak hi.

³Gitlohna in lungmuanna piangsak lo a, thuman mite lungmuang takin om uh hi.

⁴Zi hoih pen a pasal’ minthanna le lungdamna hi a, a pasal a maizumsak zi pen a pasal a dingin a dam thei lo guhnatna tawh kibang hi.

⁵Thuman mite in a kilawm a kituakin hong bawl a, migilote bek in hong khem nuam hi.

⁶Migilote’ thugente mi thahnopna bekbek hi a, midikte’ thugente in lauhuaina sunga om mite a honkhia hi.

⁷Migilote in sihna tuakin cimang a, thuman mite nungta-in khang kizom hi.

⁸Mipilte kiphatin kipahtawi a, mihaite kineu-et hi.

⁹Nektawm ding nei lopi-in milian bangin omna sangin nuntakna ding na semin mi mawkmawk hihna hoihzaw hi.

¹⁰Midikte in a gannote hoihtakin don a, migilote in a gannote bawlsia hi.

¹¹Nakpi takin lo khote in an hau a, man nei lopi-in hun beisakna in haina ahi hi.

¹²Migilote’ belh munmuanhuai pen leikhal bangin kitamzan a, mihoihte’ zung kip tawntung hi.

¹³Migilote in a zuaugenna uh awkpih a, thuman mite buaina tawh kipelh hi.

¹⁴Mite in kam hoih pauna hangin thaman ngah uh a, a sepna bangun zong thaman ngah uh hi.

¹⁵Mihaite pen amau mah thuman kisa tawntung a, mipilte in mi’ thugenna ngai nuam uh hi.

¹⁶Mihaite in a hehna uh langsakpah uh a, mipilte in a hehna uh ipzo hi.

¹⁷Thuman mite in thu taktak mah gen uh a, zuau tecite in khemna thu bek gen uh hi.

¹⁸Ngaihsun lo-a kampauna in tem hiam bangin mi liamsak thei a, mipilte’ kampauna in tua bang liamna damsak thei hi.

¹⁹Thuman genna kip tawntung a, thuzuau genna tomno sung bek kimang hi.

²⁰Thusia ngaihsunte lungkham uh a, thuhoih vaihawmte lungdam uh hi.

²¹Thuman mite tungah thusia tung lo a, migilote lungkhamna tawh kidim hi.

²²TOPA in zuaugen mite mudah a, mi citakte tungah a lungdam hi.

²³Mipilte in a theihna uh im khinkhian a, mihaite in a haina uh pholaklak hi.

²⁴Mi thanuamte vanglian a, mi thadahte sila suak hi.

²⁵Lunghihmawhna in lungkhamna piangsak a, kampau hoih in mi lungdamsak hi.

²⁶Midikte in a gamtatna uh tel et a, migilote a gamtatna un lam pialsak hi.

²⁷Thadahte a tup tung ngei lo a, a thanuamte in a deih ngah hi.

²⁸Mi thumante’ gamtatna in nuntakna piangsak a, mihaite’ gamtatna in sihna piangsak hi.